2025 Raigam Tele’es වඩාත් ජනගත නිළිය සහ Popular Awards හි තාරුණ්‍යයේ ජනප්‍රිය නිළිය සම්මාන දිනාගත් ජනප්‍රිය රංගන ශිල්පිණි මිෂෙල් දිල්හාරා ඉන්දියාවේ නව දිල්ලිහි විශ්වවිද්‍යාලයේ සහ රමනුජාන් විශ්වවිද්‍යාලයේ පාරිසරික දේශනයකටද පසුගිය කාලයේ සහභාගිවීමේ අවස්ථාවද උදාරකරගත්හ. දැනට ලෝකයේ ක්‍රියාත්මක වන ලොකුම පාරිසරික සංවිධානයක් වන Earth Day ආයතනයේ ශ්‍රී ලංකා තානපතිනිය වන්නේද ඇයයි. ඇයත් සමඟ ඉන්දියාවේ තානාපතිධූරය දරන්නේ සුප්‍රකට බොලිවුඩ් නිළි ජුහි චව්ලාය. එහි ගෝලිය උපදේශක කමිටුවේ හොලිවුඩ් සුප්‍රකට නළු ලියනාඩෝ ඩිකැප්‍රියෝ, අනිල් කපූර්, Zac Efron ඇතුළු නියෝජිතයින් රැසක් සිටිති. Earth Day සංවිධානය රටවල් 192ක ක්‍රියාත්මක වන අතර එහි අවුරුද්දකට බිලියනයකට අධික පිරිසක් ව්‍යාපෘති සඳහා එකතු වේ.
2025 ලෝක පරිසර දිනයේ තේමාව වුණේ ”End Plastic Pollutionය. ලෝක පරිසර දිනයට සමගාමීව ශ්‍රී ලංකාවේ ඉන්දියානු මහ කොමසාරිස් සන්තෝෂ් ජා මහතා සහ ඔහුගේ භාර්යාව වන තනූජා ජා මහත්මිය සමඟ India House හිදී රුක් රෝපණ වැඩසටහනක් පසුගියදා පවත්වන ලදී. Plant 4 Mother යන අගමැති ශ්‍රී නරේන්ද්‍ර මෝදිගේ සංකල්පයක් යටතේ මෙම වැඩසටහන පැවැත්විණි. ඉන්දීය අගමැති මෝදි පසුගිය වර්ෂයේ නවදිල්ලියේ බුද්ධ ජයන්ති උද්‍යානයේ බෝධි පැළයක් සිටුවා Plant 4 Mother වැඩසටහන ආරම්භ තිබේ. ඉන්දීය මහා කොමසාරිස් සන්තෝෂ් ජා මහතා තිරසාර අනාගතයක් සඳහා රට පුරා වැඩසටහන් ගණනාවක් සිදුකර ඇත. ඉන්දීය මහ කොමසාරිස් සමඟ ජනප්‍රිය රංගන ශිල්පිණි මිෂෙල් දිල්හාරා පැවැත් වූ මෙම වැඩසටහනේ මූලික අරමුණ වූයේ පුද්ගලයන් වශයෙන් අපේ පරිසරය අපි ආරක්ෂා කරන්න, අපිට වගකීමක් තියෙනවා යන පණිවුඩය වර්තමාන තාරුණ්‍යය අතර ප්‍රචලිත කිරීමය.
2020 වසරේදී දී ශ්‍රී ලංකාවේ Earth Day Network තානාපති විදියට මිෂෙල් දිල්හාරා පත්විය. ඇය පාසල් මට්ටමින් සහ විශ්ව විද්‍යාල මට්ටමින් තරුණයන් සමඟ පරිසර සාක්ෂරතාවය ගැන දැනුවත් කිරීමේ වැඩසටහන් සහ ප්‍රායෝගික වැඩසටහන් ක්‍රියාත්මක කර තිබේ. දැනට විශ්වවිද්‍යාල 11 ක් සමඟ ව්‍යාපෘති 250 කට අධික සංඛ්‍යාවක් පවත්වා ඇත.
“UNEP” දත්ත වලට අනුව, අවුරුද්දකට ප්ලාස්ටික් ටොන් මිලියන 430 කට වඩා නිෂ්පාදනය වෙනවා. ඒවායින් තුනෙන් දෙකක් එදිනෙදා පාවිච්චියට ගන්න ප්ලාස්ටික් සහ පොලිතීන් නිෂ්පාදන. අපද්‍රව්‍ය විදියට බැහැර කරන මේ plastic මුහුදට එකතු වෙලා micro ප්ලාස්ටික් විදියට මිනිස්සුන්ගේ ආහාර වලටත් එකතු වෙනවා. සාමාන්‍යයෙන් අවුරුද්දකට micro ප්ලාස්ටික් අංශු 78,000 ත් 211,000 ත් අතර ප්‍රමාණයක් මිනිස් ශරීරයට එකතු වෙනවා.
අපි හැමෝම එකතු වුණොත් අපිට අපේ පරිසරය ආරක්ෂා කරගන්න පුළුවන්. ඒක අපිට විතරක් නෙවෙයි ඉදිරි පරම්පරාවටත් පිරිසිදු, සුරක්ෂිත පරිසරයක් අපිට ඉතුරු කරන්න පුළුවන්. මොකද එක්සත් ජාතීන්ගේ සංවිධානයේ වාර්තා වලට අනුව මිනිත්තුවකට දරුවන් 267 ක් ඉපදෙනවා. දිනකට දරුවන් දළ වශයෙන් 385,000 ක් ඉපදෙනවා. අවුරුද්දකට දලළ වශයෙන් මිලියන 140 ක් ඉපදෙනවා. ඉතින් අපේ මේ ඊළඟ පරම්පරාවට අපි මොනවගේ පරිසරයක්ද ඉතුරු කරන්නේ කියන තීරණය අපි සතුයි.” යැයි මෙම වැඩසටහනේදී ඇය වැඩිදුරටත් පැවසුවාය.
දිනේෂ් විතාන
