පැල්මඬුල්ල – ඕපනායක, මල්මීකන්ද පාරිසරික නිකේතනයට යාව පිහිටි Nectar Mountain හෝටලය පාරිසරික සංචාරක කර්මාන්තය, කඳු නැගීම, කඳවුරු අත්දැකීම් ඇතුළු ක්‍රියාකාරකම් රැසක් වෙනුවෙන් නව කළමනාකාරීත්වයකට පවරා ගැනීම ජාත්‍යන්තර පාරිසරික දිනයට සමගාමීව සිදුකෙරුණි. ඒ අනුව දිවයිනේ ප්‍රකට සූර්යබල තාක්ෂණික සේවාවන් සපයන ADS Solar සහ DS Capital යන සමාගම් ඇතුළත් ADS Group මගින් මෙහි ඉදිරි කළමනාකරණ කටයුතු සිදුකිරීම ආරම්භ කරන ලදී.
මෙසේ කළමනාකරණය කරනු ලබන Nectar Mountain හෝටලය පාරිසරික සංචාරක කටයුතු සඳහා මෙන්ම ක්‍රියාදාම කටයුතු සඳහා විශේෂයෙන් වෙන්කරනු ලබන බවත්, මල්මීකන්ද ප්‍රදේශයේ පවතින සොබා සෞන්දර්යය, පාරිසරික අගය, ඓතිහාසික අගය සහ වනජ නිෂ්පාදන සඳහා සුවිශේෂ තැනක් ලබාදී ගම්වාසීන්ට ද මෙහි ආර්ථික ප්‍රතිලාභ ලබාදෙන්නට කටයුතු කරන බව හෝටලයේ නව කළමනාකරණ කටයුතු භාරගැනීම සඳහා පැමිණි ADS Solar සහ DS Capital යන සමාගම්හි අධ්‍යක්ෂ සහ සාමාන්‍යාධිකාරී චන්දන දීපවංශ මහතා පැවසීය.
මෙම අවස්ථාවට මුන්ඩිගල ආරණ්‍ය සේනාසනාධිපති පූජ්‍ය මුන්ඩිගල නායක ස්ථවීර, ඇස්වත්ත ශ්‍රී ආනන්දාරාමාධිපති, කිරිවන්දල උප පරිවේණාධිපති පූජ්‍ය ඕපනායක ධම්ම විසුද්ධි නායක ස්ථවීර, ඇස්වත්ත ශ්‍රී ආනන්දාරාමාධිකරී පූජ්‍ය සුමනරංසි යන හිමිවරුන්, ඕපනායක පොලිස් ස්ථානාධිපති එච්.ඒ.ඩී.එන්. හෙට්ටිආරච්චි, මල්මීකන්ද මහජන සෞඛ්‍ය පරීක්ෂක නිපුන් අභිෂේක, හෝටලයේ අධිපති චරිත් වක්කුඹුර, නව කළමනාකාරීත්වයේ ජ්‍යෙෂ්ඨ කළමනාකාර සඳලි හංසිකා සහ මෙහෙයුම් කළමනාකාර විනෝද් හසංක, හෝටල් කළමනාකරු රසිත ජයවර්ධන යන මහත්ම මහත්මීන් ඇතුළු පාරිසරික සංචාරක ක්ෂේත්‍රයේ ප්‍රවීණයන් සහ මාධ්‍යවේදීන් ද සහභාගි වූහ.
- ජගත්
