සෑම වසරකම ජුනි මස 08 වැනිදාට යෙදෙන ලෝක සාගර දිනය නිමිත්තෙන් වන ජාතික වැඩසටහන 08 වැනි ඉරිදා කොළඹ වරාය නගර වෙරළ පරිශ්‍රයේදී පැවැත්විණි. ඒ පරිසර අමාත්‍ය වෛද්‍ය දම්මික පටබැඳි මහතාගේ නියෝජ්‍ය අමාත්‍ය ඇන්ටන් ජයකොඩි මහතාගේ ප්‍රධානත්වයෙන්. අමාත්‍යාංශ ලේකම් කේ. ආර්. උඩුවාවල, ක්ලීන් ශ්‍රී ලංකා ජාතික වැඩසටහනේ නිලධාරීන් සහ සමුද්‍රිය පරිසර ආරක්ෂණ අධිකාරියේ නිලධාරීන් ද ඊට සහභාගි වූහ. සාගරයේ වටිනාකම සහ සාගරය ආරක්ෂා කරගැනීමේ අවශ්‍යතාවය පිළිබඳව දැනුවත් කරමින් ලෝක සාගර දිනය සමරනු ලබන අතර මෙවර එහි තේමාව වන්නේ “සුරකිමු අප රකින අසිරිමත් මහ සයුර” යන්නයි. කොළඹ වරාය නගර වෙරළ පරිශ්‍රයේදී -Colombo Port City හිදී පැවැති මෙවර සැමරුම් දිනයට සමගාමීව ක්‍රියාකාරකම් රාශියක් සංවිධානය කර තිබුණේ පාසල් දරුවන්ගේ හා ප්‍රජාවගේ අවධානය සාගර පරිසර පද්ධතියට යොමු කරමින්.
සාගර පරිසර පද්ධතියට අදාළව එහිදී ප්‍රදර්ශනයක් පැවති අතර ඊට ප්‍රදර්ශන කුටි 35ක් පමණ ඇතුළත් විය. සමුද්‍රීය පරිසර ආරක්ෂණ අධිකාරියේ මූලිකත්වයෙන් සංවිධානය කළ වැඩසටහන සඳහා ක්ලීන් ශ්‍රී ලංකා ජාතික වැඩසටහන, පරිසර අමාත්‍යාංශය සහ ඊට අනුබද්ධ ආයතනවල සහයෝගයද ලබා දී තිබිණි. සමුද්‍ර ජීවී ප්‍රදර්ශනයක්, පාසල් ළමුන් සහ කුඩා ළමුන් සඳහා චිත්‍ර තරගයක්, සමුද්‍ර අපද්‍රව්‍ය භාවිතා කරන නිර්මාණ තරග, මුහුදු වැලි යොදා කරන නිර්මාණ තරගයක් ද සංවිධානය කර තිබුණි. මීට අමතරව මුහුදු පත්ල පිරිසිදු කිරීමේ වැඩසටහන්, සමුද්‍ර දූෂණය පිළිබඳ විද්වත් කථිකාවක්, ප්‍රදර්ශනාත්මක වොලිබෝල් තරගයක් සහ වීථි නාට්‍ය ද ලෝක සාගර දිනයට සමගාමීව සංවිධානය කර තිබිණි.
සාගර පරිසරයට එදිනෙදා වන බලපෑම අවම කිරීමටත්, සාගර පරිසර දූෂණය වැළැක්වීමටත්, සාගර පරිසරය හා බැඳුණු ධීවර මෙන්ම සංචාරක කර්මාන්තවල තිරසාර බව සහතික කිරීමටත් මහජනතාවගේ දායකත්වය ලබා ගැනීම පිළිබඳව ද මෙම දිනයේදී සහ එම වැඩසටහන්වලදී අවධානය යොමුවිණි.
