වාලම්පුරි දින පනහයි
ලක්මාල් ධර්මරත්න අධ්‍යක්ෂණය කළ වාලම්පුරි සිනමා නිර්මාණය මේ දිනවල බොහෝ දෙනාගේ කතාබහට ලක්වෙන නිර්මාණයක් බවට පත්වෙලා. කූඹියෝ නිර්මාණය කළ ලක්මාල්ගේ වාලම්පුරි සිනමා නිර්මාණය පසුගිය බදාදා දින පනහ සපිරුවා. ලක්මාල් සමග ‘සිනමා කලා’ මේ සංවාදය වාලම්පුරි පිළිබඳවය.
ඔබ අධ්‍යක්ෂණය කළ වාලම්පුරි සිනමා නිර්මාණය දින පනහ සපිරුවා. මේ වෙනකොට ලැබෙන්නේ මොන වගේ ප්‍රතිචාරද?
ඉතාම ඉහළයි. දින පනහට අයිති වුණ සති අන්තයේ පවා අපේ සිනමාශාලා බොහොමයක් හවුස්ෆුල්. සිනමාශාලා හිමියන් කියන්නේ චිත්‍රපටය තවත් දවස් පනහක්වත් පෙන්නමු කියලා. ඒක ඇත්තටම අපේ කණ්ඩායමට විශාල සතුටක්.
පිටපත නිර්මාණය වුණු ආකාරය ගැනත් කතා කළොත්?
මීට අවුරුදු අටකට විතර කලින් තමයි මමයි දමිතයි සත්‍ය කතාවක් ඇසුරෙන් මේක ලියන්න පටන්ගත්තේ. සමාජයේ පරිසාධන සීමාවට පහළින් ජීවත්වෙන මිනිස් කණ්ඩායමේ ජීවන අරගලය සහ ඒකේ සෞන්දර්ය නිරූපණය කිරීම තමයි අපේ උත්සාහය වුණේ.
සිඩ්නි චරිතය ලියනකොට ප්‍රියන්ත සිරිකුමාරව ඔබේ හිතට ආවද?
ඔව්. ඇත්තටම එයාව හිතාගෙන තමයි ලිව්වේ.
වාලම්පුරි රූගත කිරීමේදී මුහුණ දුන් අභියෝග මොනවාගේද?
වාලම්පුරි කියන්නේම අභියෝගම තමයි. මුල්ම සම නිෂ්පාදකවරයා අපිව අතෑරලා ගිය දවසේ ඉඳලා මේ අද දක්වාම අභියෝග සිය දහස් ගාණක් ආවා. ජනාධිපතිවරු හතරදෙනෙක් මාරුවුණා, ෆිල්ම් එක අතරතුර. හැබැයි නිෂ්පාදකවරු, රංගන ශිල්පීන් සහ තාක්ෂණික කණ්ඩායම එකා වගේ අල්ලගෙන හිටිය හයිය නිසා තමයි අපි අද මේ චිත්‍රපටයේ දින පනහක් සමරන්නෙ.
චිත්‍රපටයේ කාලපරාසය පිළිබඳවත් කිසියම් කතිකාවක් ගොඩනැඟුණා නේද?
ඔව්. නමුත් පැය දෙකහමාරක් කියන්නේ කිසිම අපහසුවක් නැතිව රසවිඳින්න පුළුවන් කාලයක් බව අපි දින පනහක් ජයග්‍රාහීව පසුකරන මොහොතේ සපථ කළා.
චිත්‍රපටයක් හදනවට වඩා අමාරුයි නේද ප්‍රදර්ශනය කිරීම?
මම හිතන්නේ නිවැරදි ක්‍රමයට ගියොත් පහසු කරගන්න පුළුවන්. සිනමාශාලා හිමියන් බහුතරය පුදුම ආදරෙයි සිනමාවට. එයාලා තමයි ඇත්තටම ආදරේ අය. සමහරු පාඩු පිට සිනමාශාලා ඇදගෙන යන්නේ මේකට තියෙන ආදරයට. ඉතිං එයාලා සහ ප්‍රදර්ශකයන් මුහුණදෙන අභියෝග තේරුම් අරගෙන සුහදතාවයෙන් හා අවබෝධයෙන් ගියොත් අමාරු ගමනක් නෙවෙයි. මගේ ප්‍රදර්ශකයා එල්.එෆ්.ඩී. කියන්නේ මට විශාල ශක්තියක්.
වාලම්පුරි නිර්මාණයට එතෙරින් ලැබෙන ප්‍රතිචාර මොන වගේද?
ඉතාම ඉහළයි. මම දින දොළහක් ඔස්ට්‍රේලියානු සංචාරයක නිරතවෙලා ලංකාවට ආවේ. එහේ අපි වාර්තාගත දර්ශන වාර 150 ක් පසු කළා. ඊට අමතරව රටවල් 30 ක ප්‍රදර්ශනය වෙනවා. ඒ හැම රටෙන්ම ලැබෙන ප්‍රතිචාර ඉතාම උණුසුම් සහ ආදරණීයයි.
නවක අධ්‍යක්ෂවරයෙක් විදිහට ලංකාවේ සිනමා කර්මාන්තය දකින්නේ කොහොමද?
මේ මගේ හීනය. අපි දැන් ඉන්නේ මේ කර්මාන්තය නැවත ස්ථාවර වෙමින් යන යුගයක. ඒ නිසා මම සහ කර්මාන්තයේ සියලුම දෙනා ඉතාම බලාපොරත්තු සහගතයි.
දිනේෂ් විතාන
