ඩිජිටල් පරිවර්තනයේ සහ පාරිභෝගික කේන්ද්‍රීය නවෝත්පාදනයේ අද්වීතිය කඩඉමක් සනිටුහන් කරමින්, ශ්‍රී ලංකාවේ ප්‍රථමවරට කෘත්‍රීම බුද්ධිය (AI) සහ උසස් දත්ත විශ්ලේෂණ තාක්ෂණය ඇසුරින් ස්වයංක්‍රීයව ක්‍රියාත්මක Sampath Select, ක්ෂණික පුද්ගලික ණය ලබා දීමේ විසඳුමක් හඳුන්වා දීමට සම්පත් බැංකුව පියවර ගෙන තිබේ. සම්පත් බැංකුවේ උපායමාර්ගික මුලපිරීමක් වන EvolveX හි පියවරක් ලෙස හඳුන්වාදී තිබෙන මෙම නවතම දියත් කිරීම හරහා වැඩිදියුණු කරන ලද මූල්‍ය සේවාවන්හි ප්‍රවේශය, පහසුව සහ කාර්යක්ෂමතාවයන් හේතුවෙන් දේශීය බැංකු ක්ෂේත්‍රය පරිවර්තනීය වෙනසක් සිදු කිරීමට සම්පත් බැංකුව යළිත් වරක් සමත් වී තිබේ.
Sampath Select යනු මෙරට වෙළෙදපොළෙහි මුල්වරට ක්‍රියාත්මක වන කඩදාසි රහිත ස්වයංක්‍රීය පුද්ගලික ණය ලබා දීමේ විසඳුමක් වන අතර, පාරිභෝගික දත්තයන්හි තත්කාලීන විශ්ලේෂණයන් මත පදනම්ව නිරවද්‍ය වූ අනුමැතියන් ලබාදීමට කටයුතු කරයි. සංකීර්ණ ක්‍රියාවලියකින් තොර වැඩි කාර්යක්ෂමතාවයක් සහිත ආරක්ෂිත ක්‍රමවේදයකින් යුතුව පාරිභෝගිකයාට වගකීම් සහගත සේවාවක් ලබාදීමට මෙමගින් සහතික වේ. Sampath Vishwa ජංගම යෙදුම හරහා, ක්ලික් කිරීම් 5කින් යුත් සරල ක්‍රියාවලියක් තුළින් තත්පර කිහිපයක් ඇතුළත පුද්ගල මුලික මුල්‍ය විසඳුම් වෙත ප්‍රවේශ වීමට පාරිභෝගිකයින්ට හැකියාව ලැබේ. නව්‍යකරණයෙන් යුත් AI තාක්ෂණය සහ උසස් දත්ත විශ්ලේෂණ හැකියාවන් මත ගොඩනගා ඇති මෙම ණය ලබාදීමේ විසඳුම තුළින්, පුද්ගලික ණය අයැදුම් කිරීම සඳහා බහු නාලිකා පාරිභෝගික සහභාගීත්වයක් සහිත වේගවත් සහ නිරවද්‍යතාවයෙන් යුතු අඛණ්ඩ ඩිජිටල් සේවාවක් සපයනු ලබයි.
නවතම දියත් කිරීම පිළිබඳව අදහස් දැක්වූ සම්පත් බැංකුවේ ප්‍රධාන උපායමාර්ගික නිලධාරී සංජය ගුණවර්ධන මහතා මෙසේ පැවසීය. “මෙම නවෝත්පාදනයන් ඔස්සේ ක්‍රම ක්‍රමයෙන් වෙනස්වන පාරිභෝගික අවශ්‍යතා මැනවින් හඳුනා ගැනීමටත්, ඒවා කාර්යක්ෂමව ඉටු කරදීමටත් මූල්‍ය ආයතන වලට හැකියාව ලැබෙන අතර මෙම තාක්ෂණයන් භාවිතාවෙන් පමණක් නොනැවතී ඉන් ඔබ්බට ගොස් ගනුදෙනුකරුවන්ට පහසු, වේගවත් සහ කාර්යක්ෂම සේවාවක් ලබා ගැනීමට සම්පත් බැංකුව ඔස්සේ අවස්ථාව උදා වේ. Sampath Select ඉතා සූක්ෂ්ම දත්ත ආකෘති සහ උපායමාර්ගික සහයෝගීතාවයන් ඔස්සේ ගොඩනගා ඇති අතර, ගනුදෙනුකරුවන්ගේ බැංකුකරණය පහසු කිරීමේ සහ ගැටලු‍වලට සැබැවින්ම ප්‍රතිචාර දැක්වීමේ අරමුණින් ක්‍රියාත්මක වේ. මීට පෙරදී දිගු කාලයක් වැය කරමින් ගනුදෙනුකරුවන් ලබා ගත් සේවාව, මේ අන්දමින් ස්වයංක්‍රීය කිරීමට අප ගනු ලැබූ උත්සාහය මත කාර්යක්ෂම සහ දියුණු අනාගතයක් කරා පිය නැගීමට හැකි වනු නිසැකය.
