අග්‍රාමාත්‍ය නරේන්ද්‍ර මෝදි මහතාගේ සහ ශ්‍රී ලංකා ජනාධිපති අනුර කුමාර දිසානායක මහතාගේ මඟපෙන්වීම යටතේ ඉන්දියාව සහ ශ්‍රී ලංකාව ශ්‍රී ලංකා පාර්ලිමේන්තු මන්ත්‍රීවරියන්ගේ සංසදය සහ ඉන්දීය පාර්ලිමේන්තුවේ මන්ත්‍රීවරියන් අතර සබඳතා ශක්තිමත් කිරීම සඳහා කටයුතු කරමින් සිටින බව ශ්‍රී ලංකාවේ ඉන්දියානු මහ කොමසාරිස් කාර්යාලය පවසයි.
ශ්‍රී ලංකාවේ ඉන්දීය මහ කොමසාරිස් සන්තෝෂ් ජා මහතා විසින් ඊයේ (16) ඉන්දියා හවුස් හිදි ශ්‍රී ලංකා පාර්ලිමේන්තු මන්ත්‍රීවරියන්ගේ සංසදයේ සාමාජිකාවන් සඳහා පැවැත් වූ ප්‍රිය සම්භාෂණයට අග්‍රාමාත්‍ය ආචාර්ය හරිනි අමරසූරිය මෙනවිය සහ කාන්තා සහ ළමා කටයුතු අමාත්‍ය සරෝජා සාවිත්‍රි පෝල්රාජ් මහත්මිය මෙන්ම ඇතුළු ශ්‍රී ලංකා පාර්ලිමේන්තුවේ මන්ත්‍රීවරියන් හමු වී තිබේ.
ශ්‍රී ලංකාවේ වර්තමාන පාර්ලිමේන්තුව ඉතිහාසයේ වැඩිම මන්ත්‍රීවරියන් සංඛ්‍යාවක් සිටින පාර්ලිමේන්තුව වන බැවින් මෙම සහයෝගීතාවය ප්‍රජාතාන්ත්‍රික වටිනාකම් ප්‍රවර්ධනය කිරීම සඳහා දැනට ක්‍රියාත්මක පාර්ලිමේන්තු මට්ටමේ හුවමාරු ඉහළ නංවාලීම සහ දෙරට අතර ආයතනික මනා භාවිතයන් පිළිබඳ ප්‍රවීණත්වය බෙදා හදා ගැනීම සඳහා මාහැඟි පිටිවහලක් වනු ඇති බව ද ඉන්දියානු මහ කොමසාරිස් කාර්යාලය තවදුරටත් පවසයි.
ශ්‍යාම් නුවන් ගනේවත්ත
