ජනපතිගේ තීරණය – ඇමැතිගේ ප්‍රකාශය තාමත් වැට උඩ
වෛද්‍යවරුන්ගේ ගැටලු සම්බන්ධයෙන් ජනාධිපතිවරයා ලබාදුන් තීරණය සහ සෞඛ්‍ය ඇමැතිවරයා පාර්ලිමේන්තුවේදී ප්‍රකාශ කළ තීරණ ක්‍රියාත්මක නොවේ නම් යළි වෘත්තීය ක්‍රියාමාර්ගවලට පිවිසීමට සිදුවනු ඇතැයි රජයේ වෛද්‍ය නිලධාරීන්ගේ සංගමය අනතුරු අඟවයි.
පෙරේදා (26දා) පැවති සිය සංගමයේ විධායක සභා
රැස්වීමේදී එම ගැටලු සම්බන්ධයෙන් දීර්ඝ ලෙස සාකච්ඡා පැවැත්වීමෙන් අනතුරුව සිය වෘත්තීය ගැටලු සම්බන්ධයෙන් ඉදිරියේදී ගත යුතු තීරණ පිළිබඳව එකඟතාවට පැමිණි බව එම සංගමයේ ලේකම් වෛද්‍ය ප්‍රභාත් සුගතදාස මහතා සඳහන් කරයි.
වෛද්‍යවරුන්ගේ අමතර රාජකාරි සහ නිවාඩු දින දීමනා කප්පාදු කළ පසුබිමක, සිය සංගමය දියත් කළ වෘත්තීය සටන අවසානයේ එම අගයන් පෙර තිබූ තත්ත්වයටම රැගෙන ඒමට ජනපතිවරයා එකඟවී චක්‍රලේඛ නිකුත් කළ ද කුමන බලවේගයක් විසින් හෝ ඒවා ක්‍රියාත්මක කිරීමට බලපෑම් කළේ ද යන්න විමර්ශනය කළ යුතු බව වෛද්‍යවරයා කියා සිටී.
සෞඛ්‍ය අමාත්‍යාංශය විසින් නිකුත් කර තිබූ චක්‍රලේඛයේ වැරදි සහ දෝෂ ගණනාවක් සඳහන්ව තිබූ බැවින් සිය සංගමය එම චක්‍රලේඛයට විරෝධය පළ කළ බව කියන රජයේ වෛද්‍ය නිලධාරීන්ගේ සංගමය, පසුව සෞඛ්‍ය අමාත්‍යාංශයේ ලේකම්වරයා ඇතුළු වගකිවයුතු බලධාරීන් සමග පැවති සාකච්ඡාවේදීම එම වැරදි නිවැරදි කරමින් වහාම නව චක්‍රලේඛයක් නිකුත් කිරීමට එකඟතාව පළකර තිබූ බව ද සඳහන් කරයි.
සුජීව තත්සර
