කොළඹ නගර සභාවේ බලය පිහිටුවීම සඳහා සමගි ජනබලවේගයේ නායකත්වය ඇතිව කටයුතු කරන අතරේ එය වැළැක්වීමට ආණ්ඩුව කුමන්ත්‍රණ සිදු කරන බව සමගි ජන බලවේගය පාර්ලිමේන්තු මන්ත්‍රී මුජිබර් රහුමාන් මහතා පැවසීය. එම පක්ෂ ප්‍රධාන කාර්යාලයේ පෙරේදා (04 දා) පැවැති මාධ්‍ය හමුවට සහභාගීවූ මන්ත්‍රීවරයා එහිදී වැඩිදුරටත් මෙසේද කීය,
“බහුතර බලයක් ලබා නොගත් බස්නාහිර පළාත තුළ තිබෙන නගර සභා සහ ප්‍රාදේශීය සභා කිහිපයක සභිකයන් හරහා එම නගර සභා සහ ප්‍රාදේශීය සභා සඳහා නගරාධිපතිවරයෙක්, නියෝජ්‍ය නගරාධිපති වරයෙක්, සභාපතිවරයෙක් සහ නියෝජ්‍ය සභාපතිවරයෙක් පත්කර ගැනීම සඳහා දිනයන් සහ වේලාවන් ලබාදී පළාත් පාලන කොමසාරිස්වරයා විසින් ගැසට් නිවේදනයක් නිකුත් කර තිබෙනවා. ඒ අනුව කොළඹ නගර සභාව සඳහා තේරී පත්වුණ සියලුම සභිකන්ට ලබන 16වැනිදා ආරාධනා කර තිබෙනවා. එහිදී කොළඹ මහ නගර සභාවේ නගරාධිපතිවරයා, නියෝජ්‍ය නගරාධිපතිවරයා තෝරා ගැනිම සඳහා අවශ්‍ය ඡන්දය පවත්වන්න කටයුතු කරනු ලබනවා.
ඒ වගේම ජනාධිපතිවරයා සහ ආණ්ඩුව ප්‍රකාශ කළා සියලුම පළාත් පාලන ආයතන ඔවුන් සතු කරගන්නවා කියලා. ඒ වගේම ආණ්ඩුවට පළාත් පාලන ආයතනවල බලය පිහිටුවීමට නොහැකි වුණොත් ව්‍යවස්ථාව වෙනස් කර හෝ බලය
ලබාගැනීමට අවශ්‍ය නීති සකස් කරන බව ආණ්ඩුව ප්‍රකාශ කළා. ඒ වගේම ආණ්ඩුවට පළාත් පාලන ආයතනවල බලය නොලැබුණොත් මාස කිහිපයක් තුළ පළාත් පාලන ආයතන විසුරුවාහරින බව ජනාධිපතිවරයා ප්‍රකාශ කළා. ඒ වගේම ආණ්ඩුව සමඟ වැඩකරන්න කැමැති ස්වාධීන කණ්ඩායම් සහ අනෙකුත් දේශපාලන පක්ෂවලට ප්‍රතිපාදන ලබාදෙන බවත් ආණ්ඩුවේ පිරිසක් සඳහන් කර තිබුණා.
ආණ්ඩුවේ පිරිස හැර අනෙක් සියලුම දෙනා හොරුන් ලෙස තමයි ආණ්ඩුවේ පිරිස හැඳින්වූවේ. පිරිසිදු නියෝජිතයන් සිටින්නේ ජාතික ජන බලවේගයේ පමණක් බව ඔවුන් ප්‍රකාශ කළා.
ඒ වගේම ස්වාධීන කණ්ඩායම් සමඟ සාකච්ඡා කර ඉදිරියට ගමන් කරන බව පළාත් පාලන මැතිවරණයෙන් පසුව ආණ්ඩුව ප්‍රකාශ කළා. කෙසේ නමුත් යම් පළාත් පාලන ආයතනයක සියයට 50ට වැඩි ප්‍රතිශතයක් යම් දේශපාලන පක්ෂයක් හෝ කණ්ඩායමක් ලබා ගත්තේ නැතිනම් අනිවාර්යෙන්ම ඒ සභාවේ නගරාධිපතිවරයා හෝ සභාපති තෝරන්න ඡන්ද විමසීමකට යෑමට සිදුවන බව සමගි ජන බලවේගය දිගින් දිගටම ප්‍රකාශ කළා.
අකිත පෙරේරා
