2009 ට කලින් ගෙන්වන්න බැරි වුණු කන්ටේනර් කේපී හරහා දැන් ගෙනාවා – මට කිව්වේ ජර්මනියේ ඩයස්පෝරාවෙන්
පරීක්ෂාවකින් තොරව නිදහස් කළ කන්ටේනර් තුළ තිබුණේ කේපී විසින් යුද සමයේ වේළුපිල්ලේ ප්‍රභාකරන් වෙත එවීමට තිබුණු ආයුධ තොග යැයි යාපනය දිස්ත්‍රික් ස්වාධීන මන්ත්‍රී වෛද්‍ය රාමනාදන් අර්චුනා මහතා පාර්ලිමේන්තුවේදී ඊයේ (05දා) කීය.
ඒ බව ජර්මනියේ සිටින දෙමළ ඩයස්පෝරාවෙන් තමන්ට දැනුම් දුන් බවද හෙතෙම සිංහලෙන් කියා සිටියේය.
අර්චුනා මන්ත්‍රීවරයා වැඩිදුරටත් මෙසේද පැවසීය.
“මේගොල්ලෝ ජනාධිපතිවරණයට ඉල්ලන්න පෙර ජනාධිපති ජර්මන් ගිහින් තිබුණා. ගිහින් අපේ දෙමළ ඩයස්පෝරාව හමුවුණා. හමුවෙලා කරන්න බැරි දේවල් කරනවා කියලා යම්කිසි පොරොන්දුවක් දුන්නා.
තායිලන්තයේ තිබුණු කන්ටේනර්වල තිබුණේ අපේ ප්‍රභාකරන්ගේ බඩු ටික. මම සිංහලෙන් කියන්නේ මේක කිව්වට පස්සේ මට මරණ තර්ජන එයි. ඒත් මම බය නෑ. 2009 ට කලින් ප්‍රභාකරන් ගෙන්වන්න උත්සාහ කරලා ගෙන්වන්න බැරිවුණු බඩු තායිලන්තයේ ඉතුරු වෙලා තිබුණා. කේපී (කුමරන් පද්මනාදන්) හරහා දැන් ඒ කන්ටේනර් මෙහෙට ගෙන්වලා තිබෙනවා කියලා මිනිස්සු කතා වෙනවා. මටත් ජර්මනියේ මගේ ඩයස්පෝරාවෙන් කතා කරලා කිව්වා. අන්තිමට ඉතුරු වුණු ආයුධ ටික, ගිනිඅවි ටික කන්ටේනර්වලට දාලා මේ ළඟදී ගෙනාවේ කියලා. හැබැයි මට මේක ඔප්පු කරන්න බෑ. මම වගකීමෙන් කියන්නේ. ඒ කන්ටේනර් තුන්සියේ තිබුණේ අපේ ප්‍රභාකරන්ගේ ගිනිඅවි. ඒවා ඉතිරි වෙලා තැන්තැන්වලට ගිහින් ආපහු මෙහෙට ගෙනල්ලා තිබෙනවා.
මූලාසනය – මන්ත්‍රීතුමා ඔය කරන ප්‍රකාශයේ වගකීම භාරගත යුතුයි.
රාමනාදන් අර්චුනා මහතා – අනිවාර්යයෙන් මම වගකීම භාරගන්නවා. මම සිංහලෙන් නේ කිව්වේ. ඒවා කිව්වාම මාව පාර්ලිමේන්තුවෙන් ඉවත් කරන්න මේ ජුනි 26 නඩුව තිබෙනවා. දැන් මේක කිව්වාම මාව ඉවත් කරයි. පළාත් සභා ඡන්දය එනවානේ ඒක එතකොට බලාගමු.
මගේ තාත්තා කොටි පොලිසියේ ඉන්න කාලේ කකුල තුවාල වෙලා මැරුණා. කකුල කෑලි කෑලිවලට කපලා තිබෙනවා. මට කොටි ඩයස්පෝරාවෙන් සල්ලි දුන්නා. ඕගොල්ලන්ගේ ජනාධිපතිතුමාටත් සල්ලි දුන්නා.
අකිත පෙරේරා, රනිල් ධර්මසේන
