රියදුරු බලපත්‍රය වසරකට අත්හිටුවයි
රථ වාහන අංශයේ නිලධාරීන්ට කන්තලේ ප්‍රධාන මහෙස්ත්‍රාත්වරියගෙන් ප්‍රශංසා
අධික ලෙස බීමත්ව රිය පැදවීම සම්බන්ධයෙන් අධිකරණය හමුවට පමුණුවා සිටි පුද්ගලයකුට කන්තලේ ප්‍රධාන මහෙස්ත්‍රාත් ඩී.පී.ජී. සඳරේකා මහත්මිය මාස දෙකක බරපතල වැඩ සහිත සිර දඬුවම් නියම කර ඊට අමතරව රියදුරු බලපත්‍රය වසරකට අත්හිටුවන ලදී. තවද රුපියල් තිස් දාහක දඩ මුදලක් ගෙවීමට ද නියම කළාය.
මෙහිදී මහෙස්ත්‍රාත්වරිය විශේෂ ප්‍රකාශයක් කරමින් දැයේ මල් වැනි අනාගතය භාර ගැනීමට සිටින දරුවන්ගේ ජීවිත බේරා ගැනීම සඳහා කළ මෙහෙවරට උරදුන් නිලධාරීන්ට තමන්ගේ දැඩි ප්‍රශංසාව හිමිකරන බවත් රථවාහන අංශයේ නිලධාරීන් ගෙන් රට බලාපොරොත්තු වන්නේ මෙවැනි උතුම් ක්‍රියාවන් බවත් සඳහන් කර සිටියා ය.
මෙසේ දඬුවම් නියම වූයේ ඇල්ල ප්‍රදේශයේ පදිංචි 38 හැවිරිදි රියැදුරකුට ය. පසුගියදා ඇල්ල ප්‍රදේශයේ සිට පාසල් දරුවන් රැගෙන අධ්‍යාපන චාරිකාවක් සඳහා ත්‍රිකුණාමලය බලා පැමිණි බස් රථයක් තඹලගමුව ප්‍රදේශයේදී මහාමාර්ග යතුරුපැදි ඒකකය විසින් පරීක්ෂාවට ලක්කළ අවස්ථාවේ රියදුරු බීමතින් සිටි බැවින් ඔහු අත්අඩංගුවට ගෙන වෙනත් රියදුරකු මාර්ගයෙන් දරුවන් චාරිකාව යෑමට සැලැස් වීයග බීමත්ව සිටි රියදුරු අධිකරණයට ඉදිරිපත් කිරීමෙන් අනතුරුව මෙසේ දඬුවම් පමුණුවන ලදී.
කන්තලේ – ඩබ්ගඑම්ග වික්‍රමසිංහ
