වැහැර ස්ටිකර් වෙළෙඳසලක් ගිනිගනී

ගිනි නිවන රථ 4ක් යොදාගෙන පැය 2න් ගින්න මඬී

කුරුණෑගල – කොළඹ ප්‍රධාන මාර්ගයේ වැහැර ප්‍රදේශයේ ගොඩනැඟිල්ලක පිහිටි ස්ටිකර් වෙළෙඳසලක ඊයේ (03දා) පස්වරුවේ හටගත් ගින්න පැය 2ක් වැනි කාලයකදී මැඬපැවැත්වූ බව කුරුණෑගල මූලස්ථාන පොලිසිය පවසයි.

ඊයේ පස්වරු 1.30ට පමණ හටගත් මෙම ගින්න මැඬපැවැත්වීම සඳහා කුරුණෑගල මහ නගර සභාවේ ගිනි නිවීම් රථ 4ක් යොදාගත් බවද ගින්නෙන් එම වෙළෙඳසලේ කිසිවකුටවත් ජීවිත හානියක් හෝ තුවාල සිදුවී නැතැයි ද පොලිසිය පවසයි.

ගින්නට හේතුව මෙතෙක් හෙළිවී නොමැත. ගින්න හටගැනීමත් සමග මුළු ප්‍රදේශයම කළු දුමාරයෙන් වෙළී ගොස් ඇත.

මේ පිළිබඳව කුරුණෑගල මූලස්ථාන පොලිසියේ ස්ථානාධිපති ප්‍රධාන පොලිස් පරීක්ෂක පුෂ්පලාල් මහතාගේ උපදෙස් මත පොලිස් පරීක්ෂක ප්‍රියංකර ඇතුළු නිලධාරීහු කණ්ඩායමක් පරීක්ෂණ සිදු කරති.

ප්‍රදීප් ප්‍රසන්න සමරකෝන්