පාසල් ශිෂ්‍යාවක පාසල් යාමට නිල ඇඳුමින් නිවසේ සිට පැමිණ වඳුරඹ පොදු වැසිකිළියට ගොස් නිල ඇඳුම් ගලවා සිවිල් ඇඳුමකින් සැරසී ඇයගේ පෙම්වතා යැයි හඳුන්වනු ලැබූ තරුණයකු සමග පැන යාමට සුදානම් වීමේදී ප්‍රදේශවාසින් විසින් කාන්තා පොලිස් නිලධාරිනියකගේ සහාය ඇතිව සිසුවිය හා පෙම්වතා අල්ලා පොලිසියට භාර දී ඇති බව වඳුරඹ පොලිසිය පවසයි.
මෙම සිසුවියගේ ක්‍රියාකලාපය අවට සිටි පිරිස විසින් දැක රාජකාරි සඳහා පොලිසිය වෙත ගමන් කරමින් සිටි කාන්තා පොලිස් නිලධාරිනියකට දැන්වීමේන් පසු එම නිලධාරිනිය සිවිල් ජනයාගේ ද සහාය ඇතිව එම පාසල් ශිෂ්‍යාව හා පෙම්වතා යැයි පැවසූ අය පොලිස් ස්ථානය වෙත රැගෙන ගොස් ඇත.
මෙසේ පොලිස් අත්අඩංගුවට පත්වී ඇත්තේ අට ශ්‍රේණියේ ඉගෙනුම ලබන පාසල් ශිෂ්‍යාව හා වඳුරඹ හෝටලයක සේවය කරන තරුණයකු බව පොලිසිය කියයි. පසුව වඳුරඹ පොලිස් ස්ථානාධිපති පොලිස් පරීක්ෂක කේ. සී. අයි. ක්‍රිෂාන්ත මහතා ප්‍රමුඛ නිලධාරීන් මෙම ශිෂ්‍යාවට හා එම තරුණයාට අවවාද කර ඔවුන්ගේ දෙමාපියන් කැඳවා දෙමාපියන්ට ද අවවාද කර දරුවන් භාරදුන් බැව් පොලිසිය කියයි. තව ද බාල වයස්කාර දැරිවියකට සිදුවීමට ගිය බරපතල අපරාධයක් වඳුරඹ බස් නැවතුම්පොළෙහි රාජකාරි කළ වේලා සටහන් කරන නිලධාරී, ජනතාව හා තම කාන්තා පොලිස් නිලධාරීනිය කාලෝචිත ක්‍රියාත්මක වීම හා අවධානය යොමුකිරීම නිසා වැළකී ඇති බැව් පොලිස් ස්ථානාධිපතිවරයා පැවසීය.
අදාළ ශිෂ්‍යාව හා එම තරුණයා අත්අඩංගුවට ගෙන පොලිසිය වෙත රැගෙන යාම කර ඇත්තේ අංක 10233 දරන කාන්තා පොලිස් කොස්තාපල් පියුමි විසිනි.
ලලිත් චාමින්ද සහ එස්.කේ කළුආරච්චි ගාල්ල
