මෙම මස 06 වැනිදා සිය 90 වැනි ජන්ම දිනය සමරන පිටුවහල් කරන ලද ටිබෙට් රාජ්‍යයේ ආධ්‍යාත්මික නායක දලෙයි ලාමාතුමා තමන්ගේ අනුප්‍රාප්තිකයා සිය මරණයෙන් පසු පත් වන බව තහවුරු කර තිබේ. මේ අනුව දලෙයි ලාමාතුමා සිය අනුප්‍රාප්තිකයා වශයෙන් පත්කරගන්නා තම මීළඟ උත්පත්තිය (පුනරුත්පත්තිය) හඳුනාගැනීමේ බලය 2015 වසරේදී ඔහු විසින් පිහිටුවනු ලැබූ ‘ගඩෙන් පෝ ඩෑන්ග්’ භාරයට පවරා දී තිබේ. එම භාරයට හැර වෙනත් කිසිවෙකුට සිය අනුප්‍රාප්තිකයා තෝරා පත් කරගැනීමේ ක්‍රියාවලියට මැදිහත් වීමේ බලයක් නොමැති බවද දලෙයි ලාමාතුමා අවධාරණය කර තිබේ. එමෙන්ම මීළඟ දලෙයි ලාමාතුමා උපත ලබනුයේ චීනයෙන් පිටත බවද ඔහු වැඩිදුරටත් සඳහන් කර තිබේ.
දලෙයි ලාමාතුමා විසින් මෙම කරුණු අනාවරණය කර ඇත්තේ ටිබෙටයෙන් නෙරපීමෙන් පසු ඔහු වසර ගනනක් මුළුල්ලේ වාසය කරන උතුරු ඉන්දීය නගරයක් වන ධරම්ශාලා නගරයට රැස්ව සිටි සිය ගණනක් වූ සිය
අනුගාමිකයන් අමතමිනි. වත්මන් දලෙයි ලාමාතුමා සිය පරපුරෙහි 14 වැනියා වන අතර 1935 වසරේ ජූලි මස 06 වැනිදා චීනයේ කුඩා ගම්මානයක් වන ‘ටක්ට්ස්කර්’ හි උපත ලබා තිබේ. ඔහු පෙර සිටි දලෙයි ලාමාතුමාගේ පුනරුත්පත්තිය වශයෙන් හඳුනාගෙන ඇත්තේ දෙහැවිරිදි වියේදී වන අතර චීනය විසින් 1959 වසරේදී ටිබෙටය එරටට ඈඳා ගැනීමෙන් පසු චීන පාලනයට එරෙහිව හටගත් මහජන නැගී සිටීම අසාර්ථක වීමෙන් පසු චීනය එම වසරේ මාර්තු 17 වැනිදා ඔහුව රටින් පිටුවහල් කර තිබේ. එතැන් සිට දලෙයි ලාමාතුමා ජීවත්වනුයේ ඉන්දියාවේ ධරම්ශාලා නගරයේය. මේ අතර චීනය පවසා ඇත්තේ සිය රටට දලෙයි ලාමාතුමාගේ අනුප්‍රාප්තිකයා තෝරා පත්කරගැනීමේ අයිතිය ඇති බවයි. දලෙයි ලාමාතුමාගේ 90 වැනි ජන්ම දින සැමරුම මේ වන විට ඇරඹි තිබේ.
සංස්කරණය – ඒමන්ති මාරඹේ
