බිරිඳ දුරකථනයෙන් රහස් සම්බන්ධයක් පැවැත්වූවා
සැකකරු පාපොච්චාරණය කරයි
බිරිඳ අතුරුදන් කියා ඇල්පිටියට පැමිණිල්ලකුත් දාලා
සිය බිරිඳ සමග කුලී වැඩ සඳහා ඇල්පිටිය ප්‍රදේශයේ සිට දෙනියාය, ඌරුබොක්ක ප්‍රදේශයට ගොස් සිටියදී බිරිඳ සමග ඇති කරගත් ආරවුලක දී බිරිඳට පොල්ලකින් පහරදී මරා පදිංචි වී සිටි ඌරුබොක්ක ප්‍රදේශයේ නිවස අසල වළ දමා නැවත ගමට පැමිණ බිරිඳ අතුරුදන් බවට ඇල්පිටිය පොලිසියට පැමිණිල්ලක් සිදු කිරීමෙන් අනතුරුව පොලිසියේ සිදු කරන ලද විමර්ශනවලදී ඝාතන සිද්ධිය පිළිබඳ හෙළි කර ගැනීමට පොලිසිය සමත් වී ඇත.
සිද්ධියෙන් මරුමුවට පත්ව ඇත්තේ ඇල්පිටිය ,ඇත්කදුර ,දිවිතුර එගොඩ වත්ත ලිපිනයේ පදිංචි කාරියවසම් මාජුවාන ගමගේ ඉන්ද්‍රානි (42) නමැත්තියකි.
සිද්ධිය සම්බන්ධයෙන් පොලිසිය විසින් සිදු කරන ලද විමර්ශනවලදී මියගිය අයගේ 18 හැවිරිදි දියණියගෙන් සිදු කරන ලද ප්‍රශ්න කිරීමේදී ඝාතන සිද්ධිය පිළිබඳව සුලමුල සොයා ගැනීමට පොලිස් නිලධාරීන් සමත් වී ඇත.
අනතුරුව සිද්ධියට සම්බන්ධ සැකකරු වන රණසිංහ ගාමිණී (49) නමැත්තා අත්අඩංගුවට ගෙන ප්‍රශ්න කිරීමේදී සැකකරු විසින් සිද්ධිය පිළිබඳව පාපොච්චාරණය කරමින් සියලු තොරතුරු පවසා ඇත.
බිරිඳ සමග විවාහ වී කුලී වැඩ කරමින් ගමේ ජීවත් වන විට ඇය හොර රහසේ වෙනත් සම්බන්ධතා පැවැත්වූවා. මේ ගැන මම කිහිපවරක්ම ඇයට අවවාද කළත් එම සම්බන්ධ නතර කළේ නෑ. පසු ව බැරිම තැන මම බිරිඳ සහ දියණිය සමග දෙනියාය ඌරුබොක්ක ප්‍රදේශයේ ඉඩමක කුලී වැඩ කරන්න ගියා. ඒ ඉඩමේ ඇති නිවසක නැවතී වැඩ කරමින් සිටියදී ඇය නැවතත් ෆෝන් එකෙන් කෝල් අරගෙන කලින් සම්බන්ධතා පැවැත්වූ අය සමග රහසිගතව සම්බන්ධතා පවත්වන බව දැනගෙන ඒ ගැන විමසූ විට මා සමග රණ්ඩු වුණා. ඒ අවස්ථාවේ මම ඇයට පොල්ලකින් පහර දුන්නා. පොලු පහරවල්වලින් ඇය මියගිය පසු පදිංචි නිවස අසල වළක් හාරා සිරුර වළ දමා දියණිය සමග නැවත ගමට ආවා. මේ සිද්ධිය වුණේ 2024/02/20 වැනිදා යි. ඊට දින 4 කට පසු බිරිඳ මා හැරදමා ගිය බවට ඇල්පිටිය පොලිසියට පැමිණිලි කළා.
අත්අඩංගුවට ගත් සැකකරු සමග ඊයේ (2 වැනිදා) සිරුර වළ දමා ඇති ඌරුබොක්ක පොලිස් වසමේ පේරවත්ත ප්‍රදේශයට ගිය පොලිස් නිලධාරීන් සැකකරු විසින් පෙන්වන ලද ස්ථානය හඳුනාගෙන ඒ පිළිබඳව ඌරුබොක්ක පොලිසියේ නිලධාරීන් දැනුවත් කර සැකකරු ඌරුබොක්ක පොලිසියට භාර දී ඇත.
සිද්ධිය පිළිබඳව ඌරුබොක්ක පොලිසියේ වැඩ බලන ස්ථානාධිපති පොලිස් පරීක්ෂක ධර්මප්‍රිය මහතාගෙන් සිදු කර විමසුමකදී ඔහු පැවසුවේ සිරුර වළ දමා ඇති ස්ථානයට පොලිස් ආරක්ෂාව යොදා ඒ පිළිබඳව මොරවක මහෙස්ත්‍රාත්වරයා දැනුවත් කර ඔහුගේ නියෝග මත අධිකරණ වෛi නිලධාරියකුගේ අධීක්ෂණය යටතේ සිරුර ගොඩ ගෙන පරීක්ෂණ කටයුතු සිදු කරන බවයි.
ඇල්පිටිය පොලිසියේ මූලස්ථාන ප්‍රධාන පොලිස් පරීක්ශක අනුර විජේසිංහ මහතාගේ උපදෙස් හා මෙහෙයවීම මත උප පොලිස් පරීක්ෂක සමීර, ඌරුබොක්ක පොලිසියේ වැඩබලන ස්ථානාධිපති පොලිස් පරීක්ශක ධර්මප්‍රිය, පොලිස් කොස්තාපල්වරුන් වන (78214) චතුරංග, (85278) සම්පත්, (99299) පෙරේරා, පො.සැ.රි (6932) ජාගොඩ ආරච්චි යන නිලධාරීහු මේ පිළිබඳව පොලිස් පරීක්ෂණ පැවැත්වූහ.
ඇල්පිටිය විදානආරච්චි කීර්තිරත්න
