කාම්බෝජයේ හිටපු ඒකාධිපති පාලක හුන් සෙන් සමග පැවති දුරකථන සංවාදයක් පිටතට යෑම හේතුවෙන් ධුරයෙන් ඉවත් වන්නැයි බලපෑමට ලක්ව සිටින තායිලන්ත අගමැතිනි පෙටොන්ග්ටාම් ෂිනවත්‍රාගේ ධුරය අත්හිටුවීමට තායිලන්තයේ ව්‍යවස්ථාදායක අධිකරණය ඊයේ (01) පියවර ගෙන තිබේ.
කාම්බෝජයේ හිටපු පාලක හුන්සෙන් සමග තායිලන්ත අගමැතිනි ෂිනවත්‍රා පවත්වා ඇති මෙම දුරකථන සංවාදයේදී අගමැතිනිය විසින් හුන්සෙන් හට ඥාතිත්වයක් අඟවන පරිදි ‘අංකල්’ යනුවෙන් ආමන්ත්‍රණය කරමින් තායිලන්ත යුද හමුදා අණදෙන නිලධාරියා විවේචනය කිරීම මහජන කෝපයට හේතු වී තිබිණි.
එම දුරකථන සංවාදය පිටතට කාන්දුවීමත් සමගම 38 හැවිරිදි තායිලන්ත අගමැතිනිය ධුරයෙන් ඉවත් කරන ලෙස ඉල්ලමින් තායි අධිකරණය වෙත පෙත්සමක් ඉදිරිපත් කර තිබුණි. එම පෙත්සම මෙම දිනවල විභාග වෙමින් පවතින බව වාර්තා වේ. පෙත්සමට අනුව තායි අගමැතිනිය ධුරයෙන් ඉවත් කළහොත් පසුගිය දශක දෙකක කාලය තුළ තායිලන්ත දේශපාලනයේ ආධිපත්‍ය හිමිකරගෙන සිටි බලවත් ෂිනවත්‍රා පරම්පරාවට අයත් ධුර කාලය නිම වීමට පෙර බලය අහිමි කරගත් තුන්වන දේශපාලනඥයා බවට ඇය පත් වනු ඇතැයි විදෙස් මාධ්‍ය පවසයි.
තායිලන්ත අගමැතිනියේ ධුරය අත්හිටුවීම හේතුවෙන් එරට වැඩබලන අගමැතිවරයා වශයෙන් නියෝජ්‍ය අගමැති සුරියා ජුන්ග්රුන්ග්කිට් පත් කර තිබේ.
ඒමන්ති මාරඹේ
