ඉවත් කරගෙන නොමැති කැළි කසළ කඳු ගොඩ නැඟෙමින් පැවතීම හේතුවෙන් පිලිපීනයේ මැනිලා අගනුවර හදිසි සෞඛ්‍ය අවදානම් තත්ත්වයක් ප්‍රකාශයට පත් කිරීමට එරට බලධාරීන් විසින් කටයුතු යොදමින් සිටින බව විදෙස් මාධ්‍ය පවසයි.
පවතින තත්ත්වය සම්බන්ධයෙන් නිවේදනයක් නිකුත් කර ඇති මැනිලා නගරයේ අලුතින් තේරී පත් වූ නගරාධිපති ෆ්‍රැන්සිස්කෝ ඩොමගෝසෝ මැනිලා නගරයේ මිලියන දෙකක් පමණ වන ජනතාවගෙන් ඉල්ලා ඇත්තේ නගරය සඳහා අලුතින් කැළි කසළ එකතු කරන කසළ බඳුනක් සොයා ගන්නා තෙක් සිය නිවෙස්වල කසළ පිටතට ගෙන ඒමෙන් වළකින ලෙසයි. මැනිලා නගරයේ නගරාධිපතිවරයාට අනුව මෙසේ නගරය තුළ ඉවත් කරගෙන නොමැති කැළි කසළ කඳු ගොඩනැඟී ඇත්තේ තමන්ට ලැබිය යුතු ඩොලර් මිලියන ගණනක හිඟ මුදල් නොගෙවීම මත මැනිලා නගරයේ එකතු වන කැළි කසළ ඉවත් කරන කොන්ත්‍රාත්කරුවන් දෙදෙනා එම තනතුරුවලින් ඉවත් වීම හේතුවෙනි. මැනිලා නගරයේ ගොඩනැඟෙන කසළ කඳු හේතුවෙන් නගරය තුළ රෝග පැතිරීමේ අවදානමක් ඇති බව ද විදෙස් මාධ්‍ය විසින් වාර්තා කර තිබේ.
