මාධ්‍යවේදියකු ද ඒ අතර
සටන් විරාමයක් ක්‍රියාත්මක වනු ඇතැයි බලාපොරොත්තුවෙන් සිටි ගාසා වැසියන්ගේ එම බලාපොරොත්තුව සුන් කරලමින් එක රැයක් තුළ එල්ල වූ ඊශ්‍රායල ගුවන් ප්‍රහාර හේතුවෙන් ගාසා වැසියන් 62 දෙනකු පමණ මරුමුවට පත්ව ඇති අතර තවත් 75 දෙනකු තුවාල ලබා ඇතැයි විදෙස් මාධ්‍ය විසින් වාර්තා කර තිබේ. ඉකුත් 27 වැනි සිකුරාදා රාත්‍රියේ සිට සෙනසුරාදා අලුයම දක්වා වූ කාලයේදී ගාසා තීරයේ අවන්හලක් වෙත එක දිගට එල්ල වූ ඊශ්‍රායල ගුවන් ප්‍රහාරයන් හේතුවෙන් මෙම මරණ සිදුව තිබේ. විදෙස් මාධ්‍යයන්ට අනුව අදාළ ප්‍රහාරයන් ගාසා නගරයේ පලස්තීන ක්‍රීඩාංගණයක් අසල පිහිටි අවතැන් වූවන් වෙසෙන නිවාසයකට ද එල්ල වී ඇති අතර අනතුරුව සෙනසුරාදා දහවල් එල්ල වූ ඊශ්‍රායල ගුවන් ප්‍රහාරයන් හේතුවෙන් තවත් 11 දෙනකු මියගොස් තිබේ.
දකුණු ගාසා තීරයේ ‘අල් මාවසි’ ප්‍රදේශයේ පිහිටි තාවකාලික කූඩාරමක නිදාගෙන සිටි අවතැන් වූ පවුල්කම ඊශ්‍රායල ප්‍රහාරවලින් මියගොස් ඇති බව වාර්තා වී තිබේ. මේ අතර ගාසා තීරයේ සෞඛ්‍ය බලධාරීන්ට අනුව ඊශ්‍රායලය විසින් ගාසා තීරයේ දියත් කර ඇති යුද්ධය හේතුවෙන් මේ වනවිට 56,000කට අධික පිරිසක්
මියගොස් ඇති අතර එම පිරිසෙන් හරි අඩක් කාන්තාවන් හා ළමුන් වේ. ඊශ්‍රායලය විසින් මාස දෙකහමාරක කාලයක් මුළුල්ලේ ගාසා තීරය සඳහා පනවා ඇති ආහාර සැපයුම අවහිර කිරීමේ ක්‍රියාමාර්ගය හේතුවෙන් එම තීරයේ ජනතාව අතර දරුණු ආහාර හිඟයක් හටගෙන ඇති බව ද වාර්තා විය.
පුද්ගලයන් 62 දෙනකුට මරු කැඳවමින් ගාසා තීරයේ අවන්හලකට එල්ල වූ ඊශ්‍රායල ගුවන් ප්‍රහාරයන් හේතුවෙන් එම අවන්හලට දැඩි ලෙස හානි සිදුව ඇති අතර එම ස්ථානයෙන් දුමක් ඉහළ නඟින අයුරු සී. එන්. එන්. රූපවාහිනිය විසින් විකාශනය කර තිබේ. ඊශ්‍රායල ප්‍රහාරය එල්ල වූ අවන්හල ‘අල් බාකා’ යනුවෙන් නම් කර තිබූ අතර එය ශිෂ්‍යයන්, ජනමාධ්‍යවේදීන් මෙන්ම දුරබැහැර සිට පැමිණෙන සේවකයන් අතර ජනප්‍රිය අවන්හලක් බව වාර්තා වී තිබේ. මේ අතර මෙම ප්‍රහාරයෙන් මියගිය පිරිස අතර ඉස්මයිල් අබු හටාබ් නමැති නිදහස් මාධ්‍යවේදියා ද සිටින බව වාර්තා වේ.
විදෙස් මාධ්‍ය වාර්තාවලට අනුව ගාසා තීරයේ අවන්හලට එල්ල වූ ප්‍රහාරයෙන් තුවාල ලැබූවන්ට ප්‍රතිකාර කිරීම සඳහා රෝහල්වල පවතින දැඩි සත්කාර ඒකක ඇඳන් සංඛ්‍යාව ප්‍රමාණවත් නොවන අතර මේ හේතුවෙන්ම ප්‍රහාරයෙන් තුවාල ලබා රෝහල්ගතව සිටි ඇතැමකු පෙරේදා (30දා) දිනයේ මියගොස් තබේ.
මේ අතර ගාසා තීරයේ හමාස් මාධ්‍ය කාර්යාලයට අනුව ගාසා තීරයේ අවන්හලට එල්ල වූ ප්‍රහාරයෙන් මියගිය මාධ්‍යවේදියා සමගම ඊශ්‍රායල ප්‍රහාරවලින් මේ වනවිට මියගොස් ඇති මුළු මාධ්‍යවේදීන්ගේ සංඛ්‍යාව 228කි.
මේ අතර ඊශ්‍රායල නායකයන් විසින් ජූලි 07 වැනිදා ඊශ්‍රායල අගමැති බෙන්ජමින් නෙතන්යාහු හා ඇමරිකානු ජනාධිපති ඩොනල්ඩ් ට්‍රම්ප් අතර පැවැත්වීමට නියමිත සාකච්ඡාවෙන් පසු ගාසා තීරයේ යුද්ධය පවත්වාගෙන යා යුත්තේ කෙලෙස ද යන්න පිළිබඳව සංවාදයක යෙදී සිටියදී ඊශ්‍රායල ගුවන් හමුදා ප්‍රහාරයන් ගාසා නගරයේ අවන්හලකට එල්ල වී ඇති බව වාර්තා වේ. විදෙස් මාධ්‍යයන්ට අනුව ඊශ්‍රායල අගමැතිවරයා ගාසා තීරයේ සටන් විරාමයක් ක්‍රියාත්මක කිරීම සම්බන්ධයෙන් ද උනන්දුවෙන් පසුවේ.
සංස්කරණය – ඒමන්ති මාරඹේ
