සිරුර නිල්පැහැ වනතුරු පහර දෙමින් අතක් කඩා දමලා
පලාගිය පියා සොයා පරීක්ෂණ
සැමියා සමග එක්ව සිව්වැනි වියේ පසුවන තම දියණියට අමානුෂික ලෙස වධ හිංසා කරමින් ශරීරය නිල්පැහැ ගැන්වෙන තුරු පහර දෙමින් ඇගේ අතක් ද කඩා දැමූ තරුණ ගැබිනි මවක් අත්අඩංගුවට ගත් බවත් මේ වන විට ඇගේ සැමියා ප්‍රදේශයෙන් පලා ගොස් ඇති බවත් ජාඇල පොලිසිය පවසයි.
තදින් පහර කෑමට ලක්වී ශරීරයේ ස්ථාන ගණනාවක දැඩි තුවාල සිදුව ඇති දැරිය ජාඇල පොලිසිය මගින් ප්‍රතිකාර සඳහා රාගම ශික්ෂණ රෝහලට ඇතුළත් කොට ඇති අතර ඇය මේ වනවිට රෝහලේ නේවාසිකව ප්‍රතිකාර ලබමින් සිටී.
සිද්ධිය සම්බන්ධයෙන් අත්අඩංගුවට ගෙන ඇති සැකකාරිය ජාඇල ප්‍රදේශයේ පදංචි 18 හැවිරිදි අට මස් ගැබිනි මවක් වන අතර ප්‍රදේශයෙන් පලා ගොස් ඇති ඇගේ සැමියා 23 හැවිරිදි වියේ පසුවන කුකුළු ගොවි පොළක සේවය කරන අයකු බවත් පොලිසිය සඳහන් කරයි.
සිද්ධිය සම්බන්ධයෙන් සිදුකළ වැඩිදුර විමර්ශන කටයුතු වලදී සැකකරු 13 වැනි වියේ සිටියේදී ළමා පරිවාස කඳවුරක රැකවරණයේ සිට ඇති බව හෙළිවුණු බවත්, ඇයත් ඇගේ සැමියාත් එකතුව ඇගේ දියණියට මාස ගණනක සිට දස වධ දී ඇති අතර වධ හිංසා නිසා ඇති වුණු තුවාල වලට කිසියම් හෝ ප්‍රතිකාරයක් කර නොමැති බවත් අනාවරණය වූ බව පොලිසිය වැඩිදුරටත් පවසා සිටියි.
සැකකාරිය වැලිසර මහෙස්ත්‍රාත් අධිකරණය වෙත ඉදිරිපත් කිරීමට නියමිතය. පලා ගොස් ඇති සැකකරු කොටුකර ගැනීමට පොලිසිය උත්සහ දරමින් සිටී.
ජාඇල පොලිසියේ ස්ථානාධිපති ප්‍රධාන පොලිස් පරීක්ෂක යු. අරුලානන්දම් මහතාගේ උපදෙස් මත කාන්තා හා ළමා කාර්යාංශයේ ස්ථානාධිපතිනි කාන්තා පොලිස් පරීක්ෂක සේනාන්ති, පොලිස් සැරයන් නිලුපුල් (39608)) පොලිස් කොස්තාපල් අබේගුණවර්ධන (85905) යන නිලධාරීහු වැඩිදුර විමර්ශන කටයුතු සිදු කරති.
බී. ටී. කොටින්කඩුව – ජාඇල
