පොහොසත් රටක් ලස්සන ජීවිතයක් ක්‍රීඩාශීලි ජවසම්පන්න පරපුරක් බිහි කිරීමේ අරමුණ ඇතිව සංවිධනය කරන ලද “මැදරට පාපැදි සවාරිය” පසුගියදා මහනුවර කුණ්ඩසාලේ දිගන පිහිටි මධ්‍යම පළාත් සභා ක්‍රීඩා සංකීර්ණ පරිශ්‍රය අසලදී පැවැත්විණ.
49 වන ජාතික මහා ක්‍රීඩා උළෙල සඳහා මධ්‍යම පළාත නියෝජනය කරමින් සහභාගි වන රේසින් පාපැදි කණ්ඩායම තෝරා ගැනීම වෙනුවෙන් සංවිධානය කොට පැවති මෙම මැද රට පාපැදි සවාරියේ ශූරයා ලෙස කිරුළු පළඳින්නට මහනුවර දිස්ත්‍රික්කය නියෝජනය කරමින් තරග වැදුණු බී. ජී. සුමිත් නාලින්ද සමත් විය. දෙවන ස්ථානය ඩී. එම්. සඳසිරි දිසානායක ද තෙවන ස්ථානය එච්. එම්. ආර්. ප්‍රනාන්දු හිමිකර ගන්නා ලදී.
කිලෝ මීටර් 100කට ආසන්න දුරක් පැවති මෙම තරගාවලිය දිගන මධ්‍යම පළාත් ක්‍රීඩා සංකීර්ණය අසලින් ආරම්භ වී දිගන, තෙල්දෙණිය, මොරගහමුල දක්වා ගොස් නැවත මෝරගහමුල, තෙල්දෙණිය, දිගන, කෙන්ගල්ල, පල්ලේකැලේ, නත්තරම්පොත, තැන්නෙකුඹුර, ගුරුදෙනිය, හාරගම, කිවුල්ලිඳ දක්වා ගොස් නැවත එම මාර්ගයේම දිගන ක්‍රීඩා සංකීර්ණය අසලින් අවසන් විය.
මෙම තරගයේ දී ජයග්‍රහණ ලැබූ දස දෙනකු මධ්‍යම පළාත නියෝජනය කරමින් මෙවර ගාල්ලේ දී පැවැත්වෙන ජාතික මහා ක්‍රීඩා උළෙලේ පාපැදි තරග නියෝජනය කිරීම සඳහා සුදුසුකම් ලබාගැනීමට සමත් විය.
මධ්‍යම පළාත් ක්‍රීඩා අධ්‍යක්ෂ එම්. යූ. නිශාන්ත මහතාගේ උපදෙස් මත ක්‍රීඩා දෙපාර්තමේන්තුව මගින් ප්‍රථම වරට සංවිධානය කොට පැවති මෙම අවස්ථාවට මූලස්ථාන දිස්ත්‍රික් ක්‍රීඩා නිලධාරී ලක්ෂ්මන් විජේසේකර, මාතලේ දිස්ත්‍රික් ක්‍රීඩා නිලධාරී අජිත් කුලතුංග ඇතුළු ක්‍රීඩා නිලධාරීන් පිරිසක් සහභගි වී සිටියහ.
ජානක සම්පත් බණ්ඩාර – ගුන්නෑපාන
