ක්‍රීඩා අමාත්‍යංශය සහ ක්‍රීඩා සංවර්ධන දෙපාර්තමේන්තුව එක්ව වාර්ෂිකව සංවිධානය කරනු ලබන ජාතික මහ ක්‍රීඩා උළෙලේ 49 වැන්න ගාල්ල දිස්ත්‍රික්කයේ පිහිටි දඩැල්ල ක්‍රීඩාංගණය කේන්ද්‍ර කර ගනිමින් ක්‍රියාත්මක කිරීමට පියවර ගෙන ඇත.
ඒ අනුව යමින් මෙවර ජවන හා පිටිය මලල ක්‍රීඩා තරගාවලිය අගෝස්තු මස 29, 30 සහ 31 යන තෙදිනයන්හි දඩැල්ලේ පිහිටි ගාල්ල දිස්ත්‍රික් ක්‍රීඩා සංකීර්ණ පිටියේ දී පැවැත්වේ.
මලල ක්‍රීඩාවට සමගාමීව වෙරළ වොලිබෝල් සහ කබඩි තරග ද එම දින ත්‍රිත්වය තුළ දඩැල්ලේ දී පැවැත් වීමට තීරණය කර තිබේ.
මලල ක්‍රීඩාවට අමතරව වෙරළ බොලිබෝල්, කබඩි, පාපන්දු, කාය වර්ධන, බොක්සිං, පැසි පන්දු, වෙරළ කබඩි, කරාතේ දෝ, එල්ලේ, කැරම්, හෑන්ඩ් බෝල්, චෙස්, බැඩ්මින්ටන්, හොකී, මේස පන්දු, ක්‍රිකට්, ජිම්නාස්ටික්, රගර්, ජූඩෝ, පිහිනුම්, බර ඉසිලීම, ටයිකොන්ඩෝ, වූෂූ, මල්ලව පොර, නෙට්බෝල්, සැහැල්ලු පන්දු ක්‍රිකට්, වොලිබෝල්, කඹ ඇදීම, පාපැදී, තරග ඇවිදීම, මැරතන් සහ රට හරහා දිවීම මෙවර ජාතික මහා ක්‍රීඩා උළෙලට අයත් සෙසු ක්‍රීඩා වන බව ක්‍රීඩා අධ්‍යක්‍ෂ අයි. පී. විජේරත්න මහතා නිවේදනය කර සිටී.
මෙම වසරේ තරග කාල සටහන ආරම්භ කරමින් පසු ගිය මාර්තු මස 15 දින නුවරඑළිය ගෝල්ෆ් ක්‍රීඩාංගණ පරිශ්‍රය කේන්ද්‍ර කර ගනිමින් රට හරහා දිවීමේ තරගාවලිය ක්‍රියාත්මක කෙරුණි.
මෙරට කෙළිබිම තුළ වාර්ෂිකව ක්‍රියාත්මක කෙරෙන සුවිශාලතම ක්‍රීඩා එකතුව ලෙස ජාතික මහා ක්‍රීඩා උළෙල සැළකෙන අතර එහි ආරම්භය 1972 වර්ෂය දක්වා ඈතට දිවෙයි. ආරම්භක ක්‍රීඩා උළෙලට කේ. බී. රත්නායක මහතා ක්‍රීඩා අමාත්‍ය ලෙස ද එල්. ඩබ්ලිව්. මඩුගල්ල මහතා ක්‍රීඩා අමාත්‍යාංශ ලේකම් ලෙස ද ඔස්ටින් රාජකරුණා මහතා ක්‍රීඩා අධ්‍යක්‍ෂ ජනරාල් ලෙස ද කටයුතු කළහ. ආරම්භක ජාතික මහ ක්‍රීඩා උළෙල අනුරාධපුරයේ දී ක්‍රියාත්මක කෙරුණු අතර එයට පාපන්දු, වොලිබෝල්, නෙට්බෝල්, මැරතන්, පාපැදි සහ මලල ක්‍රීඩා තරග ඉසව් ඇතුළත්ව තිබිණි.
ආරම්භක අවධියේ දී අන්තර් දිස්ත්‍රික් මට්ටමින් ක්‍රියාත්මක කෙරුණු ජාතික මහා ක්‍රීඩා උළෙල දැන් ක්‍රියාත්මක කෙරෙන්නේ අන්තර් පළාත් මට්ටමිනි.
ඒ අනුව යමින් ක්‍රියාත්මක කෙරෙන මෙවර තරගාවලිය ද බස්නාහිර, මධ්‍යම, ඌව, උතුර, දකුණ, නැගෙනහිර, උතුරු මැද, සබරගමුව සහ වයඹ පළාත් අතර පැවැත්වේ.
පසු ගිය වර සමස්ත ශූරතාව දිනා ගනිමින් ඒ සඳහා පිරිනමන ලද “ජනාධිපති අභියෝග කුසලාන” දිනා ගැනීමට බස්නාහිර පළාත නියෝජනය කළ ක්‍රීඩක ක්‍රීඩිකාවෝ සමත් වූහ. ශූරයන් වූ බස්නාහිර පළාතට රන් 186, රිදී 82 සහ ලෝකඩ 90 ලෙස පදක්කම් 358ක් දිනා ගත් අතර රන් 45, රිදී 47 සහ ලෝකඩ 64 ලෙස පදක්කම් 156ක් දිනා ගත් මධ්‍යම පළාතට අනු ශූරතාව හිමි විය. තෙවන ස්ථානය දකුණු පළාත (රන් 37, රිදී 42, ලෝකඩ 47) සතු විය.
අනුරුද්ධ හේරත් බණ්ඩාර
