පැතුම්ගේ සුපිරි ශතකයත් සමග ශ්‍රී ලංකාව ප්‍රබල තැනක

චන්දිමාල් ශතකය පෙනි පෙනී දැවීයයි

ශ්‍රී ලංකා – බංග්ලාදේශ දෙවැනි ටෙස්ට් තරගය

සංචාරක බංග්ලාදේශ ක්‍රිකට් කණ්ඩායම සහ ශ්‍රී ලංකා ක්‍රිකට් කණ්ඩායම අතර එස්. එස්. සී. ක්‍රීඩාංගණයේදී පැවැත්වෙන දෙවැනි ටෙස්ට් තරගයේ දෙවැනි දිනයේ ශ්‍රී ලංකාව බංග්ලාදේශ පළමු ඉනිමට වඩා ලකුණු 43ක් ඉදිරියෙන් සිටිමන් ඉතා ප්‍රබල තත්ත්වයක සිට දෙවැනි දිනය නිමා කළේය.

ඒ දෙවැනි දිනයේ තරගය නිමා වන විට පැතුම් නිස්සංක ශතකයක් ලබා ගනිමින් ශ්‍රී ලංකා ක්‍රීඩාලෝලීන්ට ටෙස්ට් තරගය ජයග්‍රහණයේ බලාපොරොත්තු තබමිනි.

තරගයේ දෙවැනි දිනය ඇරඹුවේ බංග්ලාදේශ කණ්ඩායම පළමු ඉනිම සඳහා රැස්කළ ලකුණු 220ක් සමග තවත් කඩුලු දෙකක් පමණක් අතැතිවය.

කෙසේ වෙතත් පළමු දිනයේ බංග්ලාදේශ ප්‍රබලම කඩුලු දෙක දවාගත් මංගල ටෙස්ට් වරම් ලද සොනාල් දිනුෂ දෙවැනි දිනයේ අවසන් කඩුල්ල දවා ගනිමින් බංග්ලාදේශ කණ්ඩායමේ පළමු ඉනිම ලකුණු 247කට සීමා කළේය.

ඒ අනුව ශ්‍රී ලංකා කණ්ඩායම පළමු ඉනිම ඇරඹුවේ පැතුම් නිස්සංක සහ ළහිරු උදාර සමගයි. මුල සිටම වේගවත් පිතිකරණයක යෙදුණු ආරම්භක පිතිකරුවන් දෙදෙනා ශ්‍රී ලංකා ලකුණු පුවරුව ඉක්මනින් උඩට ගෙන ඒමට සමත් වූහ. ඒ අනුව දෙවැනි දිනයේ දිවා ආහාරයට තරගය නතර කරනවිට කිසිවකු නොදැවී ලකුණු 83ක් ලබා ඉතා ප්‍රබල තැනක පසුවිය.

දිවා ආහාරයෙන් පසු එස්. එස්. සී. පිටියේදී තරගය ආරම්භ වූ අතර වැඩි වේලාවක් කඩුල්ලේ රැඳී සිටීමට ළහිරු උදාරට අවස්ථාව උදා නොවූ අතර නයිජුල් ඉස්ලාම් යැවූ පන්දුවකට ළහිරු දැවී ගියේ කඩුල්ල මුවා කිරීමේ වරදට හසුවීමෙනි. ඒ වන විට ශ්‍රී ලංකා ලකුණු පුවරුව ලකුණු 88ක් වී තිබිණි.

පැතුම් නිස්සංකට එක්වූ දිනේෂ් චන්දිමාල් එස්. එස්. සී. පිටියේ බංග්ලාදේශ පන්දු යවන්නන්ට අත දිගහැර පහර දෙන්නට පටන් ගත්තේ දෙවැනි තරගයේ වාසිය ශ්‍රී ලංකාව පැත්තට නතුකර ගනිමිනි. තේ පානය වන විට ශ්‍රී ලංකා කණ්ඩායම එක් කඩුල්ලක් දැවී ලකුණු 190ක් ලබා සිටියහ.

පිතිකරුවන්ගේ පාරාදීසයක් බවට පත්වූ එස්. එස්. සී. තණනිල්ලේ පැතුම් නිස්සංක ඊයේ සිය ජාත්‍යන්තර ටෙස්ට් දිවියේ සිව්වන ශතකය ලබා ගැනීමට සමත් විය. පැතුම් පන්දු 167කට මුහුණ දෙමින් හතරේ පහර 12ක් ලබා ගනිමින් සිය ශතකය ලබා ගත්තේය. තවද පැතුම් සිය නිජබිමේදී පිට පිට ලබාගත් දෙවැනි ශතකය විය.

දෙවැනි කඩුල්ල වෙනුවෙන් පැතුම් නිස්සංක සහ දිනේෂ් චන්දිමාල් දෙදෙනා ලකුණු 194ක සබඳතාවක් ගොඩනඟමින් සිටියදී නයීම් හසන් යැවූ පන්දුවකට ජාත්‍යන්තර ටෙස්ට් පිටියේ 17 වැනි ශතකය ආසන්නයේ සිටි දිනේෂ් චන්දිමාල් ඉතා අවාසනාවන්ත ලෙස දැවී ගියේ ලකුණු 93ක් ලබා සිටියදීය.

චන්දිමාල්ගේ ලකුණු 93ට එක් හයේ පහරක් සහ හතරේ පහරවල් 10ක් ඇතුළත් විය.

දෙවැනි දිනයේ තරගය නිමාවන විට ශ්‍රී ලංකා කණ්ඩායම කඩුලු 2ක් දැවී ලකුණු 290ක් ලබා ගෙන සිටියේය.

සුසිල් ජයකොඩි
එස්. එස්. සී. ක්‍රීඩාංගණයේ සිට

සංස්කරණය – සුසිල් ජයකොඩි