සිව්වන සතියේ තරග අද – හෙට අනිද්දා

19න් පහළ ප්‍රමුඛ පෙළ රග්බි පාපන්දු තරගාවලිය

ශ්‍රී ලංකා පාසල් රග්බි පාපන්දු සංගමය විසින් සංවිධානය කර ඇති “ඩයලොග් අභියෝග කුසලාන” අන්තර් පාසල් ලීග් ශුරතා වයස අවුරුදු 19 න් පහළ ප්‍රමුඛ පෙළ බාලක රග්බි පාපන්දු තරගාවලියේ සිව් වැනි සතියේ තරග අද (27), හෙට (28) සහ අනිද්දා (29) පැවැත්වේ.

මෙහි තරග 03 ක් සිකුරාදා දිනයේ දී ද තරග 05 ක් සෙනසුරාදා දිනයේ දී ද තරග 01 ක් ඉරිදා දිනයේ දී ද ක්‍රියාත්මක කෙරේ.

“ඩයලොග්” ආසියාටා සමාගමේ අනුග්‍රාහක ශක්තියෙන් බල ගැන්වෙන මෙවර ප්‍රමුඛ පෙළ පාසල් ලීග් ශූරතාවලිය පාසල් 18 ක සහභාගිත්වයෙන් දැන් ක්‍රියාත්මක වේ.

මෙතෙක් පැවති තරග ආශ්‍රිතව ජයග්‍රහණ අත්පත් කර ගනිමින් තම අපරාජිත බව ආරක්ෂා කර ගැනීමට කොළඹ වෙස්ලි, බම්බලපිටිය ශාන්ත පීතර, ගල්කිස්ස සාන්ත තෝමස්, කොළඹ ඉසිපතන, කොළඹ රාජකීය සහ මහනුවර ත්‍රිත්ව යන විදුහල් සමත්ව සිටින අතර වාරයේ දී මුහුණ දුන් තරග ත්‍රිත්වයම පරාජය ලැබූ පාසල් සංඛ්‍යාව 04 කි. කොළඹ තර්ස්ටන්, මහනුවර ශාන්ත අන්තෝනි, මහනුවර ධර්මරාජ සහ ගල්කිස්ස විද්‍යා විදුහල් එම කණ්ඩායම් වෙති.

මේ සතියේ තරග සැළසුම

සිකුරාදා 27 දින

මහනුවර ශ්‍රී සුමංගල සහ කොළඹ තර්ස්ටන් විදුහල් අතර බෝගම්බර දී

කොළඹ ඩී.එස්. සේනායක සහ ගල්කිස්ස විද්‍යා විදුහල් අතර හැව්ලොක්ස් පිටියේ දී

ගල්කිස්ස සාන්ත තෝමස් සහ මහනුවර ධර්මරාජ අතර නිත්තවෙල දී

සෙනසුරාදා 28 දින

මහනුවර ත්‍රිත්ව සහ කොළඹ ශාන්ත ජෝසප් විදුහල් අතර ලොන්ඩන් පෙදෙසේ දී

කොළඹ වෙස්ලි සහ බම්බලපිටිය ශාන්ත පීතර අතර හැව්ලොක් පිටියේ දී

මහනුවර ශාන්ත අන්තෝනි සහ කොළඹ ආනන්ද විදුහල් අතර නිත්තවෙල දී

කොළඹ රාජකීය සහ මහනුවර විද්‍යාර්ථ අතර රාජකීය මාවත පිටියේදී

කොළඹ සහිරා සහ කොළඹ ඉසිපතන අතර මරදානේ දී

ඉරිදා 29 දින

කොළඹ මහානාම සහ මහනුවර කිංග්ස්වුඩ් විදුහල් අතර බෝගම්බර දී

අනුරුද්ධ හේරත් බණ්ඩාර