හොඳම හඹා යෑමේ වාර්තාව මහනුවරින්

ශ්‍රී ලංකා 19න් පහළ යූත් ලීග් ක්‍රිකට් තරගාවලිය

ශ්‍රී ලංකා ක්‍රිකට් ආයතනයේ මෙහෙයවීමෙන් පැවැත්වෙන අවුරුදු 19 න් පහළ ශ්‍රී ලංකා යූත් ලීග් ක්‍රිකට් 2025 තරගාවලි ඉතිහාසයේ මෙතෙක් කණ්ඩායක් හඹා ගිය දැවැන්තම ලකුණු සංඛ්‍යාවේ වාර්තාව තමන් සතු කර ගැනීමට මහනුවර කණ්ඩායම පෙරේදා (24 දා) සමත් විය. තරගාවලියේ එතෙක් අපරාජිතව සිටි කණ්ඩායමක් වූ කොළඹ දකුණු කණ්ඩායමට එරෙහිව අනුරාධපුර දිස්ත්‍රික් ක්‍රිකට් ක්‍රීඩාංගණයේ පැවැති තරගයේදී ලකුණු 357ක ඉලක්කය කඩුලු 7ක් දැවී සපුරා ගනිමින් මහනුවර කණ්ඩායම මෙම වාර්තාගත ජයග්‍රහණයට හිමිකම් කීවේය.

තරගයේ පළමුව පන්දුවට පහර දුන් කොළඹ දකුණ කණ්ඩායම නියමිත පන්දුවාර 50 අවසනදී කඩුලු 5ක් දැවී ලකුණු 356ක් ලබා ගනිමින් ප්‍රබල ඉලක්කයක් මහනුවර කණ්ඩායම හමුවේ තැබූ අතර එය හඹා ගිය කැන්ඩි ක්‍රීඩකයෝ පන්දු 2ක් ඉතිරිව තිබියදී ඉලක්කය සපුරා ගන්නා ලද්දේ කඩුලු 3ක් අත ඉතිරිවය.

ජයග්‍රාහී මහනුවර කණ්ඩායම වෙනුවෛන් පන්දුවට පහර දීමට පැමිණි පිතිකරුවන් අතරින් කැපී පෙනුණු ආදම් හිල්මි පන්දු 63 කදී ලකුණු 72ක් ලබා ගනිමින් තම කණ්ඩායම ජයග්‍රහණය වාර්තා කරන තෙක් කඩුල්ලේ රැඳී සිටියේය. ඔහුට අමතරව දිමන්ත මහවිතාරණ (51), යෝෂිත ඉසුරංග (52) සහ සෙත්මික සෙනෙවිරත්න (53) වශයෙන් අර්ධ ශතක වාර්තා කළහ. මොවුන්ට අමතරවර නායක කවීජ ගමගේ පන්දු 45කදී ලකුණු 49ක් රැස් කරමින් සිය කණ්ඩායමේ ජයග්‍රහණය වෙනුවෙන් දායකත්වය දැක්වූවේය.

ජයග්‍රහණය හඹා යෑමේදී මහනුවර කණ්ඩායමේ 5 වැනි කඩුල්ල ලෙස නායක කවීජ ගමගේ සහ 6 වැනි කඩුල්ල ලෙස චනිරු සේනාරත්න මුළු ලකුණු සංඛ්‍යාව 237 දී දැවී ගිය නමුත් 7 වැනි කඩුල්ල වෙනුවෙන් ආදම් හිල්මි සමඟ එක්වූ සෙත්මික සෙනෙවිරත්න පන්දු 63 කදී ලකුණු 86ක්ද 8 වැනි කඩුල්ලට එක්වූ නිසල අබේරත්න පන්දු 20 කදී නොබිඳුණු ලකුණු 34ක ද සම්බන්ධතාවක් පවත්වමින් සිය කණ්ඩායම ජයග්‍රහණය කරා රැගෙන ගියහ.

තරගාවලියේ මෙතෙක් පැවැති තරග 2 න් 2 ම ජයගනිමින් අපරාජිතව අද තරගයට අවතීර්ණ වුණු කොළඹ දකුණු කණ්ඩායම වෙනුවෙන් සාර්ථක ආරම්භයක් ලබා දුන් රෙහාන් පීරිස් පන්දු 3කදී හයේ පහර 4ක් සහ හතරේ පහර 13ක් සමගින් ලකුණු 112ක් ද හිරුන මතීෂ පන්දු 75 කදී ලකුණු 75ක් ලබා සිය කණ්ඩායම ලකුණු 300 සීමාවෙන් ඔබ්බට යෑම සඳහා අවශ්‍ය ප්‍රධාන අඩිතාලම එක් කළහ. මැද පෙලින් පැමිණි ඔෂාන් ද සිල්වා (46), නායක රමිරු පෙරේරා (33), සහ ජේසන් ප්‍රනාන්දු (27) අඩු පන්දු සංඛ්‍යාවකින් ලකුණු රැස් කිරීමට සමත්වීම නිසා ඔවුනට ලකුණු 350 සීමාව ඉක්මවා යෑමට අවස්ථාව උදාවිය.

මේ අතර සාලියපුර යුද හමුදා ක්‍රීඩාංගණයේදී දඹුල්ල කණ්ඩායමට එරෙහිව පැවැති තරගයේදී කඩුල්ලක තියුණු ජයක් වාර්තා කිරීමට ගාල්ල කණ්ඩායම සමත්විය. මෙය ගාල්ල කණ්ඩායම මෙවර තරග වාරයේදී වාර්තා කරන ලද පළමු ජයග්‍රහණය ලෙසින් සනිටුහන් විය. තරගයේ පළමුව පන්දුවට පහර දුන් දඹුල්ල කණ්ඩායම පන්දුවාර 48.2කදී සියලු දෙනා දැවී ලකුණු 209ක් රැස් කරන ලදුව ඊට පිළිතුරු ලෙස ගාල්ල කණ්ඩායම පන්දුවාර 48.2 කදී කඩුලු 9ක් දැවී ලකුණ් 213ක් රැස් කරමින් තරගයේ ජය වාර්තා කළේය.

කොළඹ දකුණ අපරාජිත භාවය මහනුවර බිඳ දමයි

කොළඹ දකුණ කණ්ඩායම පන්දුවාර 50කදී කඩුලු 5කදී ලකුණු 356 යි – (රෙහාන් පීරිස් 112, සුවහස් ප්‍රනාන්දු 31, හිරුන් මතීෂ 73, ඔෂාන් ද සිල්වා 46, රමිරු පෙරේරා 33, ජේසන් ප්‍රනාන්දු 27, දිනෙත් පීරිස් 12, සුමේධ ප්‍රසාද් 53/3)

මහනුවර කණ්ඩායම පන්දුවාර 49.4 කදී කඩුල 7ක් දැවී ලකුණු 357 යි – (ආදම් හිල්මි 72, දිමන්ත මහාවිතාරණ 51, පුලීෂ තිලකරත්න 12, යෝෂිත ඉසුරංග 52, කවීජ ගමගේ 49, කෞෂික කුමාරසිංහ 12, සෙත්මික සෙනෙවිරත්න 53, නිසල අබේරත්න 12, රමිරු පෙරේරා 39/2, දිනෙත් පීරිස් 58/2)

ගාල්ලට කඩුල්ලක ජයක්

දඹුල්ල පන්දුවාර 48.2 කදී සියලු දෙනා දැවී ලකුණු 209 යි – (දිනුග තේවිරු 70, ජනිඳු රණසිංහ 44, රජිත් සමරසිංහ 22, කවීෂ ලියනාරච්චි 15, දිමත් අබේසිංහ 12, මලිත් ද සිල්වා 35/3, විරාන් චමුදිත 28/2, ලිදුන නෙත්මින 42/2)

ගාල්ල පන්දුවාර 48.2 කදී කඩුලු 9 ක් දැවී ලකුණු 213 යි – (දුල්සිත් දරශන 78 විරාන් චමුදිත 24, විශ්ව සුපුන් 12, චමරිඳු නෙත්සර 40, ගිම්හාන රසාංජන 13, යූරි කොත්තිගොඩ 17, මහීෂ් සිතුම් 34/2, සනුජ නිඳුවර 35/2, විගේෂ්වරන් ආකාස් 37/2)