ශ්‍රී ලංකා ක්‍රිකට් ආයතනය සංවිධානය කළ අන්තර් සමාජ පළමු පෙළ විස්සයි – 20 ක්‍රිකට් ශූරතාව සීසීසී පිල දිනා ගත්තේය. කොළඹ ක්‍රිකට් සමාජ ක්‍රීඩාංගණයේ (සීසීසී) පෙරේදා (15දා) විදුලි ආලෝක ධාරා මධ්‍යයේ පැවැති අවසන් මහා තරගයේදී පන්දු 14ක් ඉතිරිව තිබියදී පානදුර ක්‍රීඩා සමාජය කඩුලු 6කින් පරාජය කිරීමට වනිඳු හසරංග ප්‍රමුඛ සීසීසී ක්‍රීඩකයෝ සමත් වූහ.
මෙවර අන්තර් සමාජ පළමු පෙළ විස්සයි – 20 ක්‍රිකට් ශූරතාව දිනූ සීසීසී පිලට රුපියල් මිලියන 2ක මුදල් තෑග්ගක් සමඟ ශූරතා කුසලානය පිරිනැමූ අතර, අනුශූරතාව දිනාගත් පානදුර පිලට රුපියල් මිලියන 1.5ක මුදලක් හිමිවිය.
අවසන් මහා තරගයේ වීරයා ලෙස සීසීසී පිලේ ලසිත් කෲස්පුල්ලේ රුපියල් ලක්ෂ 5ක් හා කුසලානය, තරගාවලියේ හොඳම පිතිකරු පානදුර ක්‍රීඩා සමාජයේ විශේන් හැළඹගේට රුපියල් ලක්ෂ 7.5ක් සමඟ කුසලානය, හොඳම පන්දු යවන්නා එන්සීසී පිලේ සම්පත් නිශාන්තට රුපියල් ලක්ෂ 7.5ක් සමඟ කුසලානය, තරගාවලියේ තුන් ඉරියව් ක්‍රීඩකයා පානදුර පිලේ නායක දුෂාන් හේමන්තට රුපියල් මිලියනයක් සමඟ කුසලානය හා තරගාවලියේ වීරයා පානදුර ක්‍රීඩා සමාජයේ විශේන් හැළඹගේට රුපියල් මිලියනයක් සමඟ කුසලානය පිරිනැමුණි.
ජය සංකේත ප්‍රදානය ශ්‍රී ලංකා ක්‍රිකට් ආයතනයේ උප සභාපති රවීන් වික්‍රමරත්න, ලේකම් බන්දුල දිසානායක හා විධායක කමිටු සාමාජික සහ තරගාවලි සංවිධාන කමිටුවේ සභාපති නලීන් අපොන්සු යන මහත්වරු අතින් සිදු කෙරුණි.
අවසන් මහා තරගයේ කාසියේ වාසිය දිනාගත් සීසීසී පිල මුලින්ම පන්දුවට පහරදීමට පානදුර ක්‍රීඩා සමාජයට ආරාධනා කළ හෙයින් ඕවර් 20 තුළදී කඩුලු 8කට ලකුණු 172ක් එක්වූ අතර, පිළිතුරු ඉනිම ක්‍රීඩා කළ සීසීසී පිල කඩුලු 4ක් දැවී ලකුණු 174ක් ලබා ගැනීමට සමත් විය.
සීසීසී පිල ජයග්‍රහණය කරා රෑගෙන යෑමට අඩිතාලම දැමූ ලසිත් කෲස්පුල්ලේ හා දුල්නෙත් සිගේරා එක්ව දෙවැනි කඩුල්ලට පන්දු 67කදී ලකුණු 106ක් ලබා ගැනීම කැපී පෙණුනි. ලසිත් කෲස්පුල්ලේ පන්දු 38කදී හයේ පහර 5ක් හා හතරේ පහර 6ක් සමඟ ලකුණු 78ක් ලබාගත් අතර, දුල්නෙත් සිගේරා පන්දු 34කදී හයේ පහරක් හා හතරේ පහර 4ක් සමඟ ලකුණු 38ක් ලබා ගත්තේය.
නායක වනිඳු හසරංග පන්දු 13කදී හයේ පහරක් හා හතරේ පහර 2ක් සමඟ නොදැවී ලකුණු 25ක් ලබා ගනිද්දී ඔහුගේ සහෝදර චතුරංග ද සිල්වා ජයග්‍රහණය ඉක්මන් කරමින් පන්දු 10 කදී හයේ පහර 2ක් සමඟ නොදැවී ලකුණු 20ක් ලබා සිටියේය.
පානදුර ක්‍රීඩා සමාජය අවසන් මහා තරගය දක්වා රැගෙන ඒමට ප්‍රබල දායකත්වයක් දැක්වූ ආරම්භක පිතිකරු විශේන් හැළඹගේ මෙම තීරණාත්මක අවසන් මහා තරගයේදී පන්දු 37කදී හයේ පහර 6ක් හා හතරේ පහර 5ක් සමඟ ලකුණු 73ක් ලබා ගැනීම පානදුර ඉනිමට විශාල ශක්තියක් විය. නායක දුෂාන් හේමන්ත හා විශේන් හැළඹගේ අතර 5 වැනි කඩුල්ලට පන්දු 37කදී ලකුණු 64ක සබඳතාවක් ගොඩනැගුණු අතර, විශ්ව ළහිරු හා සෙනිත හැළඹගේ අතර 8 වැනි කඩුල්ලට පන්දු 29කදී ලකුණු 55ක් එක් විය. විශ්ව ළහිරු පන්දු 18කදී ලකුණු 20ක් හා සෙනිත හැළඹගේ පන්දු 17කදී නොදැවී ලකුණු 36ක් පානදුර ඉනිමට එක් කළහ. පිට පිට පන්දු 2කදී කඩුලු 2ක් දවා ගැනීමට විශ්ව ප්‍රනාන්දු සමත් වූ අතර, චතුරංග ද සිල්වා කඩුලු 2ක් දවා ගත්තේය.
පානදුර ක්‍රීඩා සමාජය කඩුලු 8කට ලකුණු 172 (ඕවර් 20) – විශේන් හැළඹගේ 73, දුෂාන් හේමන්ත 16, ගිමඳ මල්කන් 14, විශ්ව ළහිරු 20, සෙනිත හැළඹගේ නොදැවී 36, අතිරේක 10 (විශ්ව ප්‍රනාන්දු 7/2, චතුරංග ද සිල්වා 26/2, ඉසුරු උදාන 51/2, වනිඳු හසරංග 35/1, ඉනුක කරන්නාගොඩ 17/1)
සීසීසී පිල කඩුලු 4ක් දැවී ලකුණු 174 (ඕවර් 17.4) – ලසිත් කෲස්පුල්ලේ 78, දුල්නෙත් සිගේරා 38, චතුරංග ද සිල්වා නොදැවී 20, වනිඳු හසරංග නොදැවී 25 ( නිමේෂ් විමුක්ති 26/1, නිසල තාරක 28/1, දුෂාන් හේමන්ත 33/1, සෙනිත හැළඹගේ 24/1)
