රුපියල් පන්කෝටි පනස් ලක්ෂයක් වටිනා විස්කි බෝත්ල් 673 ක් සහ ඉන්දියාවේ නිෂ්පාදිත කරදමුංගු කිලෝ ග්‍රෑම් 75 ක්, කටුනායක ගුවන් තොටුපොළ පළමු මහලේ , තීරු බදු රහිත සාප්පු සංකීර්ණ පරිශ්‍රයේ අතහැර දමා ගොස් තිබියදී ඊයේ (13 දා) අලුයම ගුවන්තොටුපොළ රේගු නිලධාරීන් පිරිසක් විසින් සොයා ගෙන අත්අඩංගුවට ගෙන තිබේ.
මෙම විස්කි සහ කරදමුංගු තොගය කුමන ගුවන් යානයක පැමිණි කුමන ගුවන් මගියකු විසින් කටුනායක ගුවන්තොටුපොළ වෙත රැගෙන එන්නට ඇත්දැයි සොයා රේගු නිලධාරීන් විමර්ශන කටයුතු ආරම්භ කර තිබේ.
මෙහිදී මෙම විස්කි සහ කරදමුංගු තොගය දමා ගොස් තිබූ ගුවන්තොටුපොළ තීරු බදු රහිත සාප්පු සංකීර්ණයේ, සාප්පුවල සේවකයින්ගෙන් ප්‍රශ්න කරමින් සහ ගුවන්තොටුපොළ ආරක්ෂක කැමරා පද්ධතිය නිරීක්ෂණය කරමින් මේවායේ හිමිකරුවන් අනාවරණය කර ගැනීමට රේගු නිලධාරීහු ප්‍රයත්න දරමින් සිටිති.
කටුනායක – ටී. කේ. ජී. කපිල
