නල්ලතන්නියෙන් ගිය වන්දනාකරුවෝ මෙවර සිරිපා පුදබිමට කසළ ටොන් 241ක් දමලා – මස්කෙළිය ප්‍රාදේශීය සභා ලේකම් සිවරාම් රාජවීරන්

ටොන් තුනක්ම ප්ලාස්ටික් බෝතල්

අවසන් වූ ශ්‍රීපාද වන්දනා (2024/2025) සමයේදී මාස 06ක කාලය තුළ නල්ලතන්නිය – ශ්‍රීපාද මාර්ගයෙන් ශ්‍රීපාද වන්දනාව සඳහා පැමිණි දේශීය වන්දනාකරුවන් විසින් ශ්‍රීපාද රක්ෂිතයට හා පුදබිම තුළ කසළ ටොන් 241ක් පමණ බැහැර කර තිබූ බව මස්කෙළිය ප්‍රාදේශීය සභාවේ ලේකම් සිවරාම් රාජවීරන් මහතා පැවසීය.

2024 දෙසැම්බර් සිට 2025 මැයි මස දක්වා මාස 06ක කාලයක් මෙවර ශ්‍රීපාද වන්දනා සමය පැවතුණි. එම කාලය තුළ දිරන කසළ ටොන් 178ක් හා නොදිරන කසළ ටොන් 63ක් පමණ දේශීය වන්දනාකරුවන් විසින් බැහැර කර ඇති බවත්, එයට ප්ලාස්ටික් ජල හා බීම බෝතල් ටොන් 03ක්ද අයත් වන බව රාජවීරන් මහතා පවසයි.

ඉකුත් වසරට වඩා මෙම වසරේ වන්දනාකරුවන් විසින් පරිසරයට කසළ මුදා හැරීමේ වැඩි ප්‍රවනතාවයක් ඇති බව පවසන සිවරාම් රාජවීරන් මහතා, දේශිය වන්දනාකරුවන් කොතෙක් දැණුම්වත් කළද ඇතැම් පිරිස් පරිසර හිතකාමී ලෙස ශ්‍රීපාද වන්දනාව සිදු නොකිරීම නිසා මෙසේ කැළි කසල බැහැර කිරීම සිදු කර ඇති බව කියා සිටී.

මෙම කසළ තොගය මස්කෙළිය ප්‍රාදේශිය සභාවට අයත් රිකාටන් ප්‍රදේශයේ පිහිටි කසළ ප්‍රතිචක්‍රීයකරණ මධ්‍යස්ථානය වෙත රැගෙන ගොස් දිරා නොයන කසළවලින් කොම්පෝස්ට් පොහොර නිෂ්පාදනය කරන බව මස්කෙළිය ප්‍රාදේශීය සභාවේ ලේකම් සිවරාම් රාජවීරන් මහතා වැඩිදුරටත් පැවසීය.

මස්කෙළිය – ගාමිණී බණ්ඩාර ඉලංගන්තිලක