රුපියල් දෙකෝටි හතළිස් එක්ලක්ෂ අසූදහසක් පමණ වටිනා විදේශයක නිෂ්පාදිත දුම්වැටි හා රුපියල් එක්ලක්ෂ අසූදහසක් වටිනා විස්කි බෝතල් 10ක් රේගු නිලධාරීන් විසින් කොළඹ 09, සිලෝන් ෂිපින් ලයින්ස් යූපීබී ගබාවේදී පෙරේදා (11වැනිදා) පස්වරුවේ අත්අඩංගුවට ගෙන තිබේ.
ගෘහ භාණ්ඩ සහ පුද්ගලික භාණ්ඩ ලෙස රේගුවට ප්‍රකාශයට පත් කරන ලද පැකේජ 26ක් තුළ සඟවා එම ගබඩාවේ තිබියදී මේවා අත්අඩංගුවට ගත් බව රේගු මාධ්‍ය ප්‍රකාශක, අතිරේක රේගු අධ්‍යක්‍ෂ ජනරාල් සීවලී අරුක්ගොඩ මහතා පැවසීය.
මෙම භාණ්ඩ තොගය ඩුබායි සිට වෙනම අංක දෙකක් යටතේ පානදුර, තොටවත්ත හි පදිංචි එම්. ආර්. එම්. රාසාන් නම් තොගකරු වෙත පැමිණ තිබේ. එම පැකේජ පරීක්ෂා කිරීමේදී, රෙදි සෝදන කුඩු පෙට්ටි තුළ විස්කි ලීටර් 10ක් සඟවා තිබී ඇත. විශේෂයෙන් සාදන ලද ගෘහ භාණ්ඩ කොටස් තුළ දුම්වැටි තොගය සඟවා තිබූ බවද ඒ මහතා ප්‍රකාශ කළේය.
ප්‍රභාත් විතාන
