ලිහිල් දඬුවමක් දෙන්නැයි තරුණියගේ ඉල්ලීම ඉවතට
වයස අවුරුදු 16 ට අඩු බාල වයස්කාර සිසුවියක් රවටාගෙන සිය ත්‍රිරෝද රථයේ නංවාගෙන ජනශූන්‍ය ප්‍රදේශයකට රැගෙන ගොස් බරපතළ ලිංගික අතවර කිරීමේ චෝදනාවකට වරදකරු කරනු ලැබූ 37 හැවිරිදි දෙදරු පියකුට කොළඹ මහාධිකරණ විනිසුරු නවරත්න මාරසිංහ මහතා ඊයේ (11දා) බරපතළ වැඩසහිත වසර 10 යක සිරදඬුවම් හා රුපියල් 30,000ක දඩයක් නියම කළේය.
එයට අමතරව වින්දිත කාන්තාවට රුපියල් ලක්‍ෂ තුනක වන්දියක් ගෙවන ලෙසට ද විත්තිකරුට නියම කළ විනිසුරුවරයා දඩ හා වන්දි මුදල් නොගෙවන්නේ නම් අමතර වසර දෙකක ලිහිල් සිරදඬුවම් ලබාදීමට ද නියෝග කළේය. විත්තිකරු එකී චෝදනාවලට වරදකරු කිරීමෙන් අනතුරුව දඬුවම් නියම කිරීමට පෙර අධිකරණයේ අවසරය ඇතිව අධිකරණය ඇමැතූ අගතියට පත් කාන්තාව මෙයට වසර ගණනාවකට පෙර එම අපරාධය සිදුකළ විත්තිකරු මේ වනවිට බාල වයස්කාර දරුවන් දෙදෙනකුගේ පියකු වන බැවින් ලිහිල් සිරදඬුවම් නියම කරන ලෙස අධිකරණයෙන් ඉල්ලා සිටියාය. අගතියට පත් පාර්ශ්වය ඉල්ලා සිටි පමණින් එලෙස ලිහිල් සිරදඬුවම් ලබාදීමේ නීතිමය හැකියාවක් තම අධිකරණයට නොමැති නමුත් විත්තිකරුගේ නීතිඥවරයා කළ කරුණු දැක්වීම අනුව විත්තිකරු පෙර වැරදි හෝ පවත්නා වෙනත් නඩු නොමැත්තකු වන බැවින් නීතිය අනුව වසර 25 ක උපරිම දඬුවමක් නියම කළ හැකි නමුත් තම අධිකරණය එලෙස ලිහිල් දඬුවම් නියම කළ බව විනිසුරුවරයා පෙන්වා දුන්නේය. නීතිඥ අසිත විපුලනායක මහතා විත්තිකරු වෙනුවෙන් පෙනී සිටියේය.
අගතියට පත් තරුණිය සිය මව සමග විත්තිකරුගේ රථයෙන් කුලී ගමනක් යමින් සිටියදී තරුණියට සිය ජංගම දුරකථන අංකය ලබාදී පසුව ඇයව හෝටලයකට කැඳවාගෙන ඇති බවත් ඇය ජාතික හැඳුනුම්පතක් හෝ නොමැති බාල වයස්කාරියක බව වටහාගත් හෝටල් පාලනාධිකාරිය නවාතැන් ලබාදීම ප්‍රතික්ෂේප කිරීමෙන් අනතුරුව පස්වරුවේ ජනශූන්‍ය ස්ථානයකට රැගෙන ගොස් එම අපරාධය සිදුකර ඇති බවත් පැමිණිල්ලෙන් කියැවිණි. විමර්ශන සිදුකළ ගල්කිස්ස පොලිසිය වෙනුවෙන් පොලිස් කොස්තාපල් 92451 ජයවර්ධන මහතා පෙනී සිටියේය.
ඒ. ජේ. ඒ. අබේනායක
