නුවර පාරේ දුම්රිය අනතුරක් වළක්වා ගත් තරුණිය කියයි
“පේරාදෙණිය සහ මහනුවර අතර දුම්රිය මාර්ගයේ තැනක ලොකු වළක් මතු වී තිබෙනවා දැක්කා. පස්සේ මං ඒ දුම්රිය ස්ථානයේ නිලධාරීන්ට දැනුම් දුන්නා” යැයි මහනුවරදි සිදුවන්නට ගිය විශාල දුම්රිය අනතුරක් වළක්වා ගත් දිරිය තරුණියක මාධ්‍ය හමුවේ පැවසුවාය.
මහනුවර අධිකරණ සංකීර්ණය අසල දුම්රිය මාර්ගයේ ඊයේ (11දා) මෙම ගිලා බැසීමේ සිදුර නිර්මාණය වී තිබිණි.
සිද්ධිය ගැන තවදුරටත් විස්තර කළ එම දිරිය තරුණිය මෙසේද කියා සිටියාය.
“මම ඊයේ (11 දා) උදේ 6.30ට විතර බත් අරගෙන එනකොට මා දැක්කා දුම්රිය මාර්ගයේ ලොකු වළක් හැදිලා තියෙනවා. පසුව මා දුම්රිය ස්ථානයට කතා කරලා මේ පණිවිඩය දුන්නා. ඊට පස්සේ දුම්රියක් ආවා. එම දුම්රිය නවතා සෙනඟ බැස්සුවා. මේ පොඩි වළ කවුරුවත් දැක්කෙ නැත්නම් ලොකු විනාශයක් වෙන්න තිබුණා. අද සතියේ දවසක් නිසා ගොඩක් දුම්රියන් මගීන් අරගෙන එහාට මෙහාට යනවා. මම සතුටු වෙනවා විශාල පිරිසකගේ ජීවිත බේරගන්න ලැබුණට.
මෙම සිද්ධියත් සමග එම මාර්ගයේ දුම්රිය ගමනාගමනය තාවකාලිකව නතර කළේය.
ප්‍රදීප් ප්‍රසන්න සමරකෝන්
