දෙහිවල ගල්කිස්ස මහ නගර සභාවේ ගිනි නිවීමේ භටයකුගේ නිවසක වගා කර තිබූ රුපියල් ලක්ෂ 36කට අධික වටිනාකමකින් යුත් යුතු කුෂ් මත්ද්‍රව්‍ය පැළ 36ක් දෙහිවල පොලිසිය මගින් අත්අඩංගුවට ගෙන ඇත. ඉකුත් (10දා) අත්අඩංගුවට පත් සැකකරු දෙහිවල, නැදිමාල, රූපසිංහ පාරේ පදිංචි 33 හැවිරිදි පුද්ගලයෙකි.
දෙහිවල පොලිස් ස්ථානාධිපතිවරයාට ලද තොරතුරකට අනුව නැදිමාල ප්‍රදේශයේ තෙමහල් නිවසක උඩු මහලේ සරුවට වගාකර තිබූ මෙම මත්ද්‍රව්‍ය පැළ සොයාගෙන ඇත. මිල අධික මෙම මත්ද්‍රව්‍ය බීජ අන්තර් ජාලය හරහා ඇණවුම් කර ලබාගෙන ව්‍යාපාරික පරමාර්ථයෙන් මෙලෙස සූක්ෂම ලෙස වගාකරන්නට ඇති බවට පොලිසිය සැක කරයි. ගල්කිස්ස කොට්ඨාස භාර ජ්‍යෙෂ්ඨ පොලිස් අධිකාරි ප්‍රශන්න බ්‍රහ්මණගේ, සහකාර පොලිස් අධිකාරි බී. එම්.එම්. එල්. වික්‍රමසිංහ යන මහත්වරුන්ගේ අධීක්ෂණය මත දෙහිවල වැඩබලන පොලිස් ස්ථානාධිපති පොලිස් පරීක්ෂක සංජීව අලුත්ගෙදර, දූෂණ මර්දන ඒකකයේ ස්ථානාධිපති උප පොලිස් පරීක්ෂක පල්ලියගුරු, පොලිස් කොස්තාපල් (94954) ප්‍රේමතිලක ,(8361) ලක්මාල්, (101813) සංගීත්, (104211) ශාලංක, (104283) මේනක,(103281) චතුරංග, (22820) රගුවරන් යන නිලධාරිහු වැඩිදුර පරීක්‍ෂණ සිදුකරති.
අත්අඩංගුවට ගත් ලක්ෂ 36ක් වටිනා කුෂ් මත්ද්‍රව්‍ය පැළ
පින්සිරි ආරියරත්න – රත්මලාන
