කැළඹුණු කාලගුණයෙන්
නිවාස 267කට අර්ධ හානි
දිවයිනට බලපා ඇති අයහපත් කාලගුණික තත්ත්වය හමුවේ කළුතර දිස්ත්‍රික්කයටද විවිධ බලපෑම් එල්ලවී ඇතැයි කළුතර දිස්ත්‍රික් ලේකම් ජනක කේ. ගුණවර්ධන මහතා කීය.
නොකඩවා ඇදහැලෙන ධාරානිපාත වැසි සහ තද සුළං හේතුවෙන් කළුතර දිස්ත්‍රික්කයේ ප්‍රාදේශීය ලේකම් කොට්ඨාස 14ක පවුල් 280කට අයත් පුද්ගලයින් 1052 ක් පීඩාවට පත්ව ඇතැයිද ඒ මහතා කීය.
සුළඟට ගස් කඩා වැටීමෙන් එක් නිවාසයකට පූර්ණ හානි සිදුවී නිවාස 267කට අර්ධ හානි සිදුවී තිබේ.
කළුතර විශේෂ – එස්. ආරච්චිගේ
මීපිළිමානේ නිවසක වහළයක් ගසාගෙන යයි
නුවරඑළියේ 130ක් ආරක්ෂිත ස්ථානවලට
මධ්‍යම කඳුකරයේ බටහිර බෑවුම් ප්‍රදේශවලට තව දුරටත් අධික සුළං සහ වැසි පතිත වීමෙන් ජන ජීවිතයට ගැටලු රැසක් මතු වී ඇත.
හැටන් ආගිල් වතුයායේ පෞද්ගලික වැඩපළක ගොඩනැඟිල්ලක වහළ පෙරේදා (31 දා) රාත්‍රියේ ගැළවී ගොස් එම ගොඩනැඟිල්ලට අලාභහානි සිදු වී ඇති බව හැටන් පොලිසිය පැවසීය.
නුවරඑළිය මීපිලිමාන හරහා හමාගිය සුළඟකින් නිවසක වහළ සම්පූර්ණයෙන්ම ගැලවී ගොස් එම නිවසට දැඩි අලාභහානි සිදුවී ඇති බව නුවරඑළිය පොලිසිය කියයි.
පවතින වර්ෂාවත් සමග හැටන්, ලිඳුල, නුවරඑළිය, නෝර්ටන්බි්‍රජ්, මස්කෙළිය යන විදුලි පාරිභෝගික සේවා මධ්‍යස්ථාන යටතේ පාලනය වන බල ප්‍රදේශවල ප්‍රදේශ රැසක විදුලි බිඳවැටීම් ගණනාවක් සිදු වී ඇති බවත්, එම බිඳවැටීම් යථා තත්ත්වයට පත්කිරීම මේ දිනවල සිදු කරන බව විදුලිබල මණ්ඩලය කියයි.
මේ අතර නුවරඑළියේ ආපදාවට පත් පවුල් 40කට අයත් සාමාජිකයන් 130 දෙනකු පමණ ආරක්ෂිත ස්ථාන කරා යොමුකර ඇති බව නුවරඑලිය දිස්ත්‍රික් ආපදා කළමනාකරණ ඒකකය පැවසීය.
නුවරඑළිය – නාලක රත්නායක
