වැඩිදුර ප්‍රතිකාර සඳහා මහනුවර රෝහලට යවලා
තමන් පහර දුන් බවට බොරු ෆේස්බුක් සටහනක් තබා ඇතැයි ගුරුවරයාගෙනුත් පොලිසියට පැමිණිල්ලක්
ගිනිගත්හේන ජාතික පාසලේ 13 ශ්‍රේණියේ ඉගෙනුම ලබන සිසුවකුට විෂයභාර ගුරුවරයා අමානුෂික ලෙස පහර දුන් බව පවසමින් එම සිසුවා නාවලපිටිය දිස්ත්‍රක් මහ රෝහලට ඇතුළත් කළ පසු වැඩිදුර ප්‍රතිකාර සඳහා ඊයේ (26) දින මහනුවර ශික්ෂණ රෝහල වෙත මාරු කර යවා ඇත.
මාස දෙකක පමණ කාලයක් තමන් පාසලට නොපැමිණි බවත්, එම මාස දෙකේ දී විෂය බාහිර පන්තිවලට ගිය බවත්, ඉකුත් 23 දා තමන් පාසලට ගිය අවස්ථාවේ විෂයභාර ගුරුවරයා තමන් වෙත පැමිණ සටහන් පොත් ඉල්ලූ අවස්ථාවේ තමන් බාහිර පන්තිවලට සහභාගි වූ සටහන් පෙන්වූ විට පොත වීසි කර දමා ගුරුවරයා අතින් තමන්ගේ මුණට පහරවල් කිහිපයක් එල්ල කළ බවත් එම සිසුවා කියයි. පසුව තමන් ගිනිගත්හේන පොලිසිට පැමිණිල්ලක් කර රෝහල් ගත වීමට පැමිණි අවස්ථාවේ එම පාසලේම වෙනත් ගුරුවරුන් තිදෙනකු ත්‍රිරෝද රථයකින් ගිනිගත්හේන පොලිසිය අසලට පැමිණ තමන් බලෙන් ත්‍රිරෝද රථයේ නංවාගෙන පාසලට රැගෙන ගොස් සිද්ධිය සම්බන්ධයෙන් පොලිසියට පැමිණිලි නොකරන ලෙසට එම ගුරුවරුන් තමන්ට බලපෑම් සිදු කළ බව ද එම සිසුවා පැවසීය. තමන්ට දැනට ශ්‍රවණ ආබාධයක් පවතින බවත්, එම සිසුවා පැවසීය.
අප මේ සම්බන්ධයෙන් ගිනිගත්හේන මධ්‍ය මහා විද්‍යාලයේ විදුහල්පති උපුල් ඉන්ද්‍රජිත් මහතාගෙන් කළ විමසුමකට ඔහු කියා සිටියේ මාස කිහිපයක් පාසලට නොපැමිණීම හේතුව එම සිසුවාගෙන් විමසා ගුරුවරයා එම සිසුවා ඇතුළු සිසුන් කිහිප දෙනෙකුට තරයේ අවවාද කර ඇති බවයි. අප මේ සම්බන්ධයෙන් ගිනිගත්හේන පොලිසියේ ස්ථානාධිපති ප්‍රධාන පොලිස් පරීක්ෂක විරාජ් විතානගෙමහතාගෙන් කළ විමසුමේ දී ඔහු කියා සිටියේ තමන් පහර දුන් බවට රෝහල්ගතව සිටින සිසුවා විසින් ඔහුගේ මුහුණු පොතේ බොරු සටහනක් තබා ඇති බවට අදාළ ගුරුවරයා පොලිසියට පැමිණිල්ලක් කර ඇති බවයි. නාවලපිටිය දිස්ත්‍රික් මහ රෝහලේ රෝහල් පොලිසිය විසින් සිසුවාගෙන්
ප්‍රකාශයක් සටහන් කරගෙන ඇති බවත්, එම ප්‍රකාශය තම පොලිසිය වෙත ලැබීමෙන් පසු සිද්ධිය සම්බන්ධයෙන් හැටන් මහේස්ත්‍රාත් අධිකරණය හමුව් කරුණු වාර්තා කරන බවත් ගිනිගත්හේන පොලිස් ස්ථානාධිපතිවරයා කියයි.
නුවරඑලිය නාලක රත්නායක
