පාපැදියෙන් යද්දී හෘදයාබාධයට ලක්වෙලා
තරග 1200කින් 700ක් ජය ලබලා
පස්දරු පියකු වන ඔහුගේ දියණියන් දෙදෙනකු සහ පුතෙකුද පාපැදි ශූරයන්
ශ්‍රී ලංකාවෙන් බිහිවූ විශිෂ්ටතම පාපැදි ධාවන ශූරයකු වන ඒ. එම්. සුමනවීර මහතා අභාවප්‍රාප්ත වූ අතර අවසන් කටයුතු අද (30 වැනිදා) රත්නපුර නිවිතිගල, පහළඑරබද්ද ප්‍රදේශයේදී සිදු කිරීමට නියමිතය.
මියයන තෙක්ම පාපැදියට පෙම්බැඳි සුමනවීර මහතා පසුගිය 27 වැනිදා පස්වරුවේදී පාපැදියෙන් ගමන් කරමින් සිටියදී හෘදයාබාධයකට ලක්වීමෙන් මියගියේය.
මියයන විට 77 වැනි වියෙහි පසුවූ සුමනවීර මහතා 1965 වසරේදී පාපැදි තරග බිමට පිවිසියේය. එතෙක් මෙතෙක් ලංකාවේ වැඩිම පාපැදි තරග සංඛ්‍යාවකට සහභාගි වී එනම් තරග 1200කට පමණ සහභාගි වී ඉන් තරග 700ක් ජයග්‍රහණය කළ පාපැදි ක්‍රීඩකයා ඔහුයි.
1984, 1985, 1986 වර්ෂවලදී ලංකා සවාරිය ඇතුඵ දින කීපයක් පැවති පාපැදි තරග රැසකින්ද, ඔහු ශූරතාව දිනූ අයෙකි. කහවත්ත ගුරුගේ මැණික් ආයතනය සංවිධානය කළ දීපව්‍යාප්ත පාපැදි තරගවලින් ජයග්‍රහණය අත්කර ගනිමින් ඔහු ක්ෂේත්‍රයේ නමක් තැබීය.
කහවත්ත සැෆායර් ක්‍රීඩා සමාජය නියෝජනය කරමින් මුල් කාලයේදී සුමනවීර පාපැදි තරග බිමේ ජයග්‍රහණ ලබා ගත්තේය. පසුව ඛනිජ තෙල් සංස්ථාවේ රැකියාවක් කරමින් පාපැදි ක්ෂේත්‍රය තුළ නොමැකෙන නමක් තැබීය.
තරගවලදී කඳු සහිත මාර්ගවල පාපැදිය පදවමින් සුමනවීර විශේෂ දක්ෂතා දැක්විය. ඔහු පස්දරු පියෙකි. දියණියන් දෙදෙනාද දක්ෂ පාපැදි ශූරියන් ලෙස කලක් පාපැදි ක්‍රීඩාවේ නිරත විය. එක් පුතෙකුද පාපැදි තරගවලට සහභාගී විය.
වියපත් වුවත් පාපැදිය අත් නොහළ සුමනවීර මහතා ඔහුගේ ගමන් බිමන්වලට මියයන මොහොත දක්වාම පාපැදිය භාවිත කළේය. ඛනිජ තෙල් සංස්ථාවේ කොලොන්නාව මධ්‍යස්ථානයේ සේවය කළ වසර ගණනාවක්ම ඔහු රත්නපුරයේ සිට දිනපතාම සේවයට ගොස් ආපසු නිවෙසට ආවේ කිලෝමීටර් සියයකට වඩා දිනපතා පාපැදියෙන් බව පවුලේ ඥාතීහු පවසති.
ඔහුගේ දේහය පහළ ඵරබද්ධ දුම්මලවත්ත නිවසේ පෙරේදා (28 දා) සිට තැන්පත් කර ඇති අතර අවසන් කටයුතු අද (30 දා) සිදු කෙරේ. සුමනවීර මහතාගේ දේහය පිළිබඳ හදිසි මරණ පරික්ෂණය රත්නපුර රෝහලේදී පැවැත්විණ.
කහවත්ත – සමරවීර නිරෝෂණ
