“ජාතික ජනබලවේගයේ ප්‍රතිපත්ති ප්‍රකාශනය ඉදිරිපත් කරමින් පාස්කු ප්‍රහාර විමර්ශන පිළිබඳව දුන් පොරොන්දුව තවමත් ඉටුවී නොමැතිවීම හා ඒ සඳහා මූලික වැඩපිළිවෙළක් හෝ ක්‍රියාත්මක කිරීමට නොහැකිවීම අප සසල කරවන්නකැයි කිව යුතුයි” යැයි අගරදගුරු මැල්කම් රංජිත් කාදිනල්තුමා පවසයි. දේව මෙහෙයක් අතරතුර අගරදගුරුතුමා මෙම අදහස් පළ කළේය. එහිදී කාදිනල්තුමා මෙසේ ද කීවේය.
මීට වසර හයකට පෙර සිදුවූ භයානක ප්‍රහාරය පිළිබඳව කොතරම් කතා කළත්, “ඒ කතන්දරය ඉවර වෙන්නේ නෑ වගේ මේ වැඩ පිළිවෙළ පිටුපස්සේ ක්‍රියාත්මක වුණු කණ්ඩායම කවුද කියලා හොයාගන්නට තාමත් අපට බැරිවෙලා තියෙනවා. තාමත් බෑ ඒක හොයාගන්න. මෙච්චර උත්සාහ කරලත් ඕක හොයාගන්න බෑ අවුරුදු හයක් තිස්සේ ඕනෑවට එපාවට ඒ වැඩේ කරනවා නම් අපි ඒ මිනිස්සුන්ගේ ජීවිතවලට කරන්නේ අගෞරවයක්.
ජනාධිපති කොමිෂන් සභා වාර්තාවේ පළමු වෙළුමේ එන 200කටත් වැඩි අධික නිර්දේශ කිසිවක් ක්‍රියාවට නැන්වීමට කිසිදු දේශපාලන නායකයෙක් හෝ පක්ෂයක් මේතාක් ක්‍රියාත්මක වී නොමැති අතර ඒ පිළිබඳව නිසි යාන්ත්‍රණයක් හෝ ආරම්භ කර නෑ.
විශේෂයෙන්ම මේ මහා ව්‍යසනය ගැන කලින් දැන සිටියත් එය වැළැක්වීමට තමන්ට නිලබලයෙන් වගකීමක් තිබුණත් කිසිවක් නොකළ හිටපු ජනාධිපතිවරයකු අගමැතිවරයකු පොලිසියේ හා ආරක්ෂක අංශවල උසස් නිලධාරීන් ගැන මේ වාර්තාවේ නිර්දේශ කර ඇති පරිදි නීතිපතිවරුන් හා එම දෙපාර්තම්න්තුව මේ කිසිදු නීත්‍යානුකූල හෝ විනයානුකූල ක්‍රියා මාර්ගයක් ගෙන ඇති බවක් දකින්නට නොමැති බව සඳහන් කරන්නේ බලවත්ම කනගාටුවෙන්. මෙතෙක් කල් නීතිපති දෙපාර්තමේන්තුව මේ ගැන කිසිවක් නොකර සිටීම ලැජ්ජා සහගත බව කිව යුතුය.
ඇතැම් දේශපාලන නායකයින් හට බැල මෙහෙවර කිරීමට ඇති ආශාව තුළ හැසිරෙන මෙවැනි දෙපාර්තමේන්තු හා රජයේ උසස් යයි කියාගන්නා නිලධාරීන් හැසිරෙන ආකාරය අපි දකිනවා. පසුගිය මැතිවරණ සමයේදී රජය විසින් පාස්කු ප්‍රහාරයේ වින්දිතයන්ට පොරොන්දුවක් ලබා දී ඇත. ඒ මේ පිළිබඳව වෝහාරිකව පැවැත්වෙන විමර්ශනවලට මග පෙන්වීමට සහ උදව්වීමටත් ඒ පිළිබඳව මේ ප්‍රහාරයේ නඩු කටයුතු පවත්වාගෙන යාමටත් බලතල ඇති විශේෂ අභිචෝධකරයෙකු සහ කාර්යාලයක් ස්ථාපිත කරන බවට රටට දුන් පොරොන්දුව මේ දක්වාම ඉටුවී නැති බව කනගාටුවෙන් වුවද ප්‍රකාශ කළ යුතුයි.
ජාතික ජනබලවේගයේ ප්‍රතිපත්ති ප්‍රකාශනය අප වෙත ඉදිරිපත් කරමින් එදා පාස්කු ප්‍රහාර විමර්ශන පිළිබඳව අපට දුන් පොරොන්දුව තවමත් එලෙසම ඉටුවී නොමැතිවීම හා ඒ සඳහා මූලික වැඩ පිළිවෙළක් හෝ දියත් කිරීමට නොහැකිවීම අප සසල කරවන්නකැයි කිව යුතුයි.
