ශ්‍රී ලංකා නිදහස් පක්‍ෂයට අත්වී ඇති පරාජිත තත්ත්වයෙන් ගොඩ ඒම සඳහා වහාම පක්‍ෂය භාරගෙන අවශ්‍ය ප්‍රතිසංධාන කටයුතු සිය මූලිකත්වයෙන් සිදු කරන ලෙස හිටපු ජනාධිපති මෛත්‍රීපාල සිරිසේන මහතාගෙන් හිටපු මන්ත්‍රීවරුන් හා ආසන සංවිධායකයන් පිරිසක් කළ ඉල්ලීම හිටපු ජනපතිවරු විසින් ප්‍රතික්‍ෂේප කර ඇත.
මේ වනවිට ශ්‍රී ලංකා නිදහස් පක්‍ෂයේ ලේකම් දුමින්ද දිසානායක මහතා ද සිරගතව සිටින හෙයින් පක්‍ෂයේ ඉදිරි ගමන අනාරක්‍ෂිත තත්ත්වයට පත්ව ඇති බවත් දැනට සිටින නායකත්වයත් සමග එකතු වී පක්‍ෂය ශක්තිමත් කිරීමට සිය නායකත්වය ලබාදෙන ලෙසත් ඉල්ලීමක් කළ බවද එම සංවිධායකයෝ ‘දිවයින ඉරිදා සංග්‍රහය’ට සඳහන් කළහ.
මෙහිදී හිටපු ජනාධිපතිවරයා සඳහන් කර ඇත්තේ තමාට පක්‍ෂයේ කිසිදු තනතුරක් භාර ගැනීමට නොහැකි බවය. එමෙන්ම පක්‍ෂ විධායක සභාව හා මධ්‍යම කාරක සභාව රැස්කර දැනට පක්‍ෂයට සුදුසු ක්‍රියාකාරීන් පත් කිරීමට තීන්දු තීරණ ගන්නා ලෙසත් කියා ඇත.
පක්‍ෂයේ තිබෙන හඬ, නඩුහබ තමා සිය කැමැත්තෙන් ඉවත් කරගෙන තිබෙන බවත් අන් අයද කරන නඩු හබ ඉවත් කරගෙන සියලු දෙනා එකතු වී පක්‍ෂය ගොඩනැගීමට කටයුතු කළහොත් පත්ව ඇති ඉරණමෙන් ගොඩඒමට හැකිවනු ඇති බවත් හිටපු ජනාධිපතිවරයා එම සංවිධායකවරුන්ට දැනුම් දී ඇත.
අරුණ බෝගහවත්ත
