රටේ ප්‍රධානම පළාත් පාලන ආයතනයක් වන කොළඹ මහ නගර සභාවේ බලය පිහිටුවන්නේ කවුදැයි හෙට (16දා) තීරණය කෙරෙනු ඇත.
ඉකුත් 06 වැනිදා පැවැති පළාත් පාලන මැතිවරණයේදී කොළඹ මහ නගර සභාව ජාතික ජන බලවේගය විසින් ජයග්‍රහණය කරන ලද නමුත් සභාවේ බහුතර සභික සංඛ්‍යාව ලබා ගැනීමට එම පක්ෂයට නොහැකි විය.
මේ හේතුවෙන් සභාවේ නගරාධිපතිවරයා තෝරා පත්කර ගැනීම සිදුකරන මංගල සභාවාරය හෙට (16දා) සිදු කිරීමට බස්නාහිර පළාත් පාලන කොමසාරිස්වරිය තීරණය කළාය. ඒ අනුව හෙට පෙරවරු 9.30ට එම රැස්වීම මහ නගර සභා රැස්වීම් ශාලාවේදී පැවැත්වීමට නියමිතය.
කොළඹ නගර සභාවේ ප්‍රථම නගරාධිපති ලෙස චාල්ස් පීටර් ලෙයාඩ් මහතා 1866දී පත්වීය. නිදහසින් පසු ප්‍රථම නගරාධිපති ලෙස 1950දී කුමාරරත්නම් මහතා පත් වූ අතර පසුව 1954දී එන්.එම්. පෙරේරා මහතා නගරාධිපති ධුරයට පත්විය.
1956දී ප්‍රථම වරට එක්සත් ජාතික පක්ෂය කොළඹ මහ නගර සභාවේ බලය හිමිකර ගත් අතර බී.ඒ. සුගතදාස මහතා එහි නගරාධිපති බවට පත්විය. එතැන් සිට 2006 දක්වා අඛණ්ඩව පාලනය කළ එජාපය එම වසරේදී මැතිවරණයට ඉදිරිපත් කළ නාමයෝජනා පත්‍රය ප්‍රතික්ෂේප විය. ඉන් පසුව කණ්ණාඩි කුට්ටම සලකුණ යටතේ තරග කළ ස්වාධීන කණ්ඩායම එක්සත් ජාතික පක්ෂයේ සහාය ඇතිව සභාව ජයගෙන එහි නායක උවයිස් මොහොමඩ් මහතා නගරාධිපති ලෙස තේරී පත්විය.
ඉන් පසුව පැවැති මැතිවරණයෙන් යළිත් එජාපය කොළඹ ජයගත් අතර අවසන් වරට 2018දී පැවැති මැතිවරණයෙන් එජාප අපේක්ෂිකා රෝසි සේනානායක මහත්මිය නගරාධිපතිනිය බවට පත් විය. ජාතික ජන බලවේගය කොළඹ නගර සීමාවේ කොට්ඨාස 48ක් ජයගත් අතර ඔවුන්ට සභික ධුර 48ක් හිමි විය. සමගි ජන බලවේගය කොට්ඨාස 14ක් ජය ගෙන මන්ත්‍රී ධුර 29ක් හිමි කර ගත්තේය. එ.ජා.ප.ය කොට්ඨාස 02ක් ජය ගෙන සභික ධුර 13ක් හිමිකර ගත්තේය. ශ්‍රී ලංකා පොදුජන පෙරමුණට සභික ධුර 05ක් ද, ශ්‍රී ලංකා මුස්ලිම් කොංග්‍රසයට 4ක් ද, ස්වාධීන කණ්ඩායම 3ට සභික ධූර 3ක් ද, සර්ව ජන බලය, එක්සත් සාම පෙරමුණ, ස්වාධීන කණ්ඩායම 4, ස්වාධින කණ්ඩායම 5 යන කණ්ඩායම් සභික ධුර 02 බැගින් ද ස්වාධීන කණ්ඩායම 2, ස්වාධීන කණ්ඩායම 1, ප්‍රජාතන්ත්‍රවාදී ජාතික සංධානය, පොදුජන එක්සත් පෙරමුණ, ජාතික නිදහස් පෙරමුණ, ජාතික ජනතා පක්ෂය හා එක්සත් ජනරජ පෙරමුණ පක්ෂය, සභික ධුර 01 බැගින් දිනාගෙන ඇත.
මෙවර නගරාධිපති ධුරයට ජාතික ජන බලවේගය පක්ෂයේ බ්‍රායි කැලි බල්තසාර් මහත්මිය ඉදිරිපත් වන අතර විපක්‍ෂයේ පක්‍ෂ වල සහයෝගයෙන් සමගි ජන බලවේගය රිසා පාරුක් මහතා තරග කරනු ඇත.
පාලන බලය ලබා ගැනීමට සමස්ත සභික සංඛ්‍යාව වන 117න් 59ක් හිමි කරගත යුතු වෙයි. නගරාධිපති අපේක්‍ෂකයන් දෙදෙනා නියෝජනය කරන පක්‍ෂ විසින් තම අපේක්‍ෂක ජය ගන්නා බවට සඳහන් කරයි.
රනිල් ධර්මසේන
