හල්දුම්මුල්ල – ඌව පරණගම මාලිමාවට
කඩුගන්නාව නගර සභාව අකුරණ ප්‍රා. සභාව – සජබට
උඩුබද්දාව – කුලියාපිටිය ප්‍රා. සභා – පොහොට්ටුවට
දිවයිනේ පළාත් පාලන ආයතන කීපයක බලය පිහිටුවීම ඊයේ (12දා) සිදුවිය. ඒ අනුව අකුරණ, හල්දුම්මුල්ල, ඌව පරණගම, කඩුගන්නාව, උඩුබද්දාව සහ කුලියපිටිය යන ප්‍රාදේශීය සභා සහ නගර සභා සඳහා නගර සභාපතිවරු ඊයේ පත්වූහ.
අකුරණ ප්‍රාදේශීය සභාවේ බලය වැඩි ඡන්දයෙන් සමගි ජන බලවේගය ප්‍රමුඛ විපක්ෂයට ඊයේ (12දා) හිමිවිය. ඊයේ උදේ පැවැති ඡන්ද විමසීමේදී වැඩි ඡන්ද 3කින් සමගි ජන බලවේගයේ ඉස්තිහාර් ඉමාදුදීන් මහතා සභාපති ධුරයට පත්වූ බව මධ්‍යම පළාත් පාලන කොමසාරිස් චමිලා අතපත්තු මහත්මිය නිවේදනය කළාය. ඡන්ද විමසීමේදී ඉස්තිහාර් මහතා ඡන්ද 13ක් ලබාගත්තේය. හල්දුම්මුල්ල ප්‍රාදේශීය සභාවේ සභාපති ධුරය වැඩි ඡන්දයෙන් ජාතික ජන බලවේගයට හිමිවිය. ඡන්ද 11ක් හිමි කරගනිමින් සභාපතිවරයා ලෙස ජාතික ජන බලවේගයේ ජගත් කුමාර රාජපක්ෂ මහතා තේරී පත්විය.
ඌව පරණගම ප්‍රාදේශීය සභාවේ සභාපති ලෙස ජාතික ජන බලවේගයෙන් ඉදිරිපත් වූ මන්ත්‍රී ආර්.ඇම්. ජිනදාස මහතා තේරී පත්විය.
කඩුගන්නාව නගර සභාවේ බලය සමගි ජන බලවේගයට හිමිවිය. බහුතර බලය ලබාගත් සමගි ජන බලවේගයේ අපේක්ෂකයා වූ ලක්ෂිත අබේරත්න මහතා නගර සභාපතිවරයා ලෙස පත්විය.
උඩුබද්දාව ප්‍රාදේශීය සභාවේ සභාපති ලෙස ශ්‍රී ලංකා පොදුජන පෙරමුණේ සභික නීතිඥ නිහාල් ජයසිංහ මහතා තේරී පත්විය.
ඊයේ කුරුණැගල පළාත් පාලන කොමසාරිස්වරයාගේ ප්‍රධානත්වෙයන් පැවැති ඡන්ද විමසීමේදී ඒ මහතා සභාපති ධුරයට පත්විය.
මේ අතර කුලියාපිටිය ප්‍රාදේශීය සභාවේ සභාපති ලෙස හිටපු සභාපති විජේසිරි ඒකනායක මහතා මෙවරත් තෝරාගැනීමට ඊයේ කොමසාරිස්වරියගේ ප්‍රධානත්වයෙන් රැස්වූ සභාවේදී කටයුතු කෙරිණි.
එහිදී ශ්‍රී ලංකා පොදුජන පෙරමුණේ අපේක්ෂක විජේසිරි ඒකනායක මහතා සමගි ජන බලවේගය, එක්සත් ජාතික පක්ෂය සහ පොදුජන එක්සත් පෙරමුණ ඇතුළු සෙසු පක්ෂවල ඡන්ද 25ක් ගෙන සභාපතිවරයා ලෙස තේරීපත්ව තිබූ අතර ජාතික ජන බලවේගයෙන් ඒ සඳහා යෝජනා වූ ධම්මික ජයලත් මහතාට ලැබුණේ ඡන්ද 21කි.
උපසභාපතිවරයා තෝරාපත් කර ගැනුණේද සභාපති තෝරාපත් කරගත් ආකාරයෙන්ම විවෘත ඡන්දයකින් වූ අතර එහිදී එම ඡන්ද සංඛ්‍යාවම දිනාගැනීමට මොහොමඩ් කාදර් ඉර්ෆාන් මහතාට හැකිවිය.
ඒ අනුව 7 වැනි කුලියාපිටිය ප්‍රාදේශීය සභාවේ සභාව ශ්‍රී ලංකා පොදුජන පෙරමුණ ප්‍රමුඛ විපක්ෂය විසින් අත්පත් කරගෙන සභාව පිහිටුවිය.
ප්‍රදීප් ප්‍රසන්න සමරකෝන්, උපේන්ද්‍ර සේරසිංහ – කුලියාපිටිය, ජනක සම්පත් බණ්ඩාර – ගුන්නෑපාන
