කතරගම රෝහලේ ඉදිකළ නව වාට්ටු සංකීර්ණය ඊයේ (12 දා) සෞඛ්‍ය ඇමැති නලින් ද ජයතිස්ස මහතාගේ ප්‍රධානත්වයෙන් ජනතා අයිතියට පත් කෙරිණ.
කතරගම දේවාලයට බැතිමතුන් ලබාදෙන පඬුරු ආදායම් උපයෝගී කරගෙන රුපියල් මිලියන තිහක වියදමක් දරා මෙම රෝහල සංවර්ධනය කිරීමට වත්මන් බස්නායක නිළමේ ඩිෂාන් ගුණසේකර මහතා ක්‍රියාකර තිබේ.
ඇඳන් 46ක වාට්ටු සංකීර්ණයක්, රෝගීන්ට අදාළ ලොකර්, නවීන වැසිකිළි පද්ධතියක්, ප්‍රසූතාගාරයක් හා සේවක පිරිස් සඳහා කාමර පද්ධතියක් මෙහි ඇතුළත් වේ.
මෙම අවස්ථාව සඳහා රුහුණු මාගම් පත්තුවේ ප්‍රධාන අධිකරණ සංඝනායක කතරගම ශ්‍රී අභිනවාරාමාධිපති ශාස්ත්‍රපති කපුගම සරණතිස්ස හිමි, රුහුණු මාගම් පත්තුවේ ප්‍රධාන සංඝනායක කතරගම කිරිවෙහෙර රාජමහා විහාරාධිපති රාජකීය පණ්ඩිත කොබවක ධම්මින්ද හිමි, කතරගම මහාසෙන් රජමහා විහාරාධිපති ශාස්ත්‍රපති මැටරඔ හේමරතන හිමි, පුජ්‍ය රාවෙලේ සුගතහිමි, වළස්මුල්ලේ ගුණරතන හිමි වැඩම කළහ.
මෙම රෝහල විවෘත කිරීමේ අවස්ථාව සඳහා වෙළෙඳ වානිජ කටයුතු නියෝජ්‍ය ඇමැති ආර්. එම්. මොණරාගල, දිසා ලේකම් පසන් රත්නායක ජයවර්ධන, මොණරාගල දිස්ත්‍රික් මන්ත්‍රී රුවන් විජේවර්ධන, කතරගම ප්‍රාදේශීය සභාවේ සභාපති ජි. පී. ඉෂාන්, මොණරාගල ප්‍රාදේශීය සෞඛ්‍ය සේවා අධ්‍යක්ෂ යන මහත්වරුද එක්වූහ.
කතරගම රෝහලේ කාර්ය මණ්ඩලය අගයමින් සිහිවටන තිළිණයක්ද දීමද ඇමැති නලීන් ජයතිස්ස මහතා අතින් සිදුවිය.
කතරගම – කේ. ඩී. දේවප්‍රිය
