ජනාකීර්ණ ‘මේඝානි නගර්’ දුමෙන් වෙළී යයි
බ්‍රිතාන්‍ය ජාතිකයෝ 53 ක් : එක් කැනේඩියානුවෙක් පෘතුගීසි ජාතිකයෝ 7ක් සමග ගුජරාට් හිටපු මහ ඇමැති විජේ රූපානිත් මගීන් අතර
ගුවන්ගත කර විනාඩි පහෙන් කඩා වැටිලා
වැටුණේ වෛද්‍ය ශිෂ්‍ය නේවාසිකාගාරයකට වෛද්‍ය සිසුන් 5ක් මරුට 40කට වැඩිය තුවාල
“වචනවලින් කිව නොහැකි තරම් හදවත කම්පනයට පත් කළා” – අගමැති නරේන්ද්‍ර මෝදි
ජනපති අනුර සොව පළ කරයි
ඉන්දියාවේ ගුජරාට් ප්‍රාන්තයේ අහමදාබාද් ගුවන්තොටුපළෙන් ලන්ඩනයේ ගැට්වික් බලා පිටත් වූ එයාර් ඉන්දියා යානයක් අනතුරට පත්ව තිබේ. පුද්ගලයින් 242 ක් රැගත් එයාර් ඉන්දියා AI 171 සර්දාර් වල්ලභභායි පටෙල් ගුවන් තොටුපළෙන් ගුවන්ගත වී විනාඩි පහකින් අනතුරට ලක්වී තිබේ.
එය කඩා වැටී ඇත්තේ මේඝානි නගර් නමැති මහජනයා වෙසන ප්‍රදේශයකටය. අනතුරට පත්වූ යානයෙන් නගින දුම නගරය වෙලා ගෙන තිබේ. ගුවන් යානය ඊයේ (12දා) පස්වරු 1 ත් 2 ත් අතර කාලය තුළ කඩා වැටුණි. ගුවන් යානයේ මුළු මගීහු 230 ක් සහ කාර්ය මණ්ඩල සාමාජිකයෝ 12 දෙනෙක් සිටියහ. එයාර් ඉන්දියා ගුවන් යානය බෝයිං 727 ද්විත්ව ජෙට් යානයකි.
එයාර් ඉන්දියා සමාගමේ සභාපති එන්. චන්ද්‍රසේකරන් මහතා සිය එක්ස් ගිණුමේ මෙලෙස සඳහන් කර තිබේ.
“අහමදාබාද් සිට ගැට්වික් බලා ක්‍රියාත්මක වන එයාර් ඉන්දියා AI 171 ගුවන් යානය අද ඛේදජනක අනතුරකට ලක් වූ බව මම දැඩි ශෝකයෙන් තහවුරු කරමි. මෙම විනාශකාරී සිදුවීමෙන් පීඩාවට පත් සියලු දෙනාගේ පවුල් සහ ආදරණීයයන් වෙත බලවත් ශෝකය පළ කරමු.”
මෙම ගුවන් යානය කපිතාන් සුමීත් සභාර්වාල් සහ පළමු නිලධාරි ක්ලයිව් කුන්දර් විසින් පදවනු ලැබූහ. කපිතාන් සුමීත් සභාර්වාල් ගුවන් පැය 8200 ක පළපුරුද්දක් ඇති ගුවන් නියමුවෙකි. සම නියමුවාට පැය 1100 ක පියාසර අත්දැකීම් තිබුණි.
සමාජ මාධ්‍යවල හුවමාරු වන වීඩියෝවක මෙම ගුවන් යානය ගුවන්ගත වී සුළු වේලාවකින් යළි පහළට පැමිණෙන අයුරු සහ එකවර ගිනිදැල්වලින් වැසී පසුව කළු විශාල දුමාරයක් නැගෙන අයුරු දැක්වේ.
ගුවන් ගමන් නිරීක්ෂණ වෙබ් අඩවියක් වන FlightRadar 24, නිකුත් කළ එක්ස් පණිවිඩයක දැක්වෙන්නේ ‘අහමදාබාද් සිට ලන්ඩන් දක්වා ගමන් කළ AI 171 එයාර් ඉන්දියා ගුවන් යානය අනතුරට ලක්වීමක් පිළිබඳව වාර්තා අපට ලැබෙමින් පවතී. ගුවන් යානයෙන් අවසන් වරට සංඥාවක් අපට ලැබුණේ 08:08:51ට.එනම් ගුවන්ගත වී තත්පර කිහිපයකට පසුවයි’ යනුවෙනි.
මෙහි මගීන් අතර 169 දෙනකු ඉන්දියානු ජාතිකයන් වන අතර, 53 දෙනෙක් බ්‍රිතාන්‍ය ජාතිකයෝ වෙති. එක් කැනේඩියානු ජාතිකයකු සහ පෘතුගීසි ජාතිකයන් 7 දෙනකු එහි ගමන් කර ඇත. ගුජරාට් හිටපු මහ ඇමැති විජේ රූපානි ද මගීන් අතර විය.
මේ සිද්ධිය සැලවීමත් සමග අගමැති නරේන්ද්‍ර මෝදි මහතා එරට සිවිල් ගුවන් සේවා අමාත්‍ය රාම්මෝහන් නායිදු මහතා සමග පෞද්ගලිකව කතා කළ අතර අහමදාබාද්හි එයාර් ඉන්දියා ගුවන් අනතුර සිදුවීම පිළිබඳව මෙහිදී කරුණු විමසූ බව මාධ්‍ය කියයි.
ඉන්දීය ගුවන් අනතුරේ දී මේඝානි නගර් හි බීජේ වෛද්‍ය විද්‍යාලයේ නේවාසිකාගාරය මතට ගුවන් යානය කඩා වැටී තිබේ. එහි අධ්‍යාපනය ලැබූ සිසුන් බොහෝ දෙනකුට ද ජීවිත අහිමි වී තිබෙන බව වාර්තා විය.
චතුර පමුණුව
