90ට අඩු ඒකකයකට අය කරන රු.4.50 වෙනසක් – නැතත් ගෘහස්ථ ගාස්තුව රු.20කින් ඉහළට
මෙම වසරේ ජුනි සිට දෙසැම්බර් දක්වා සියයට 15කින් විදුලි බිල ඉහළ දැමීමට ශ්‍රී ලංකා මහජන උපයෝගිතා කොමිෂන් සභාව තීරණය කර තිබේ. එම කාලයට අදාළව සියයට 18.3කින් විදුලි බිල ඉහළ දැමිය යුතු බවට විදුලි බල මණ්ඩලය යෝජනා කර තිබුණ ද, කොමිෂන් සභාව විසින් අවසර දී ඇත්තේ 15%කින් ගාස්තුව ඉහළ දැමීමටයි. ඒ අනුව මෙම වැඩි කිරීම ඊයේ (11 දා) මධ්‍යම රාත්‍රියේ සිට බලාත්මක වන බව ද එම කොමිසම පවසයි.
මෙහිදී ඒකක 90ට වඩා අඩුවෙන් විදුලිය පරිභෝජනය කෙරෙන ගෘහස්ථ ආගමික සහ පුණ්‍යස්ථාන සඳහා දැනට ඒකකයකට අය කරනු ලබන රුපියල් 4.50 එලෙසම පවතින අතර එම කාණ්ඩය සඳහා මාසික ස්ථාවර ගාස්තුව ද ඉහළ දමා නොමැත.
කෙසේ වෙතත් ගෘහස්ථ අංශයේ ඒකක 30ට වඩා අඩු පරිභෝජනයක් ඇති කාණ්ඩය වෙනුවෙන් මාසික විදුලි බිල රුපියල් 20කින් ඉහළ දමා ඇත. ඒකක 60 ක පරිභෝජනය සඳහා මාසික විදුලි බිල්පත රුපියල් 85කින් වැඩි කර ඇත.
ඒකක 90ක පරිභෝජනය සඳහා රුපියල් 240 කින් ද, ඒකක 120ක පරිභෝජනය සඳහා රුපියල් 360කින් ද, ඒකක 150ක පරිභෝජනය සඳහා රුපියල් 600කින් ද, ඒකක 180ක පරිභෝජනය සඳහා රුපියල් 840කින් ද මාසික බිල්පත ඉහළ යන අතර ඒකක 300ක පරිභෝජනය වෙනුවෙන් මාසික බිල්පතෙහි වැඩිවීම රුපියල් 2020 කි.
මෙම වැඩි කිරීම්වලට අනුව කර්මාන්ත අංශය සඳහා සියයට 15කින් ද, පොදු කාර්ය කාණ්ඩය සඳහා සියයට 14 කින් ද ඉහළ දමා ඇත. හෝටල් ක්‍ෂේත්‍රය සඳහා ද වැඩි කිරීම සියයට 15කි.
වත්මන් ආණ්ඩුව පත්වූ පසුව මෙම වසරේ (2025) ජනවාරි 18වැනි දින ගාස්තු සංශෝධනයක් සිදු කළ අතර එහිදී සියයට 20කින් විදුලි බිල අඩු කිරීමට මහජන උපයෝගිතා කොමිෂන් සභාව කටයුතු කළේය. ඒ අනුව බලන කළ පසුගිය වසරට (2024) සාපේක්ෂව සියයට 08ක ගාස්තු අඩුවීමක් පවතින බව ද එම කොමිෂන් සභාවේ මාධ්‍ය ප්‍රකාශක ජයනාත් හේරත් මහතා ඊයේ (11දා) මාධ්‍ය හමුවකදී කියා සිටියේය.
මෙම සමස්ත වැඩිවීම අනුව රුපියල් බිලියන 268ක ඉලක්කයක් ළඟා කර ගැනීම උදෙසා මෙම වැඩි කිරීම සිදු කළ බව ද හෙතෙම පැවැසීය.
අකිත පෙරේරා
