කැලණිය විශ්වවිද්‍යාලයීය වෛද්‍ය පීඨයේ ප්‍රසව හා නාරිවේද අධ්‍යයනාංශයේ සාඵල්‍යතා මධ්‍යස්ථානය මගින් (IVF Centre) නළදරු තාක්ෂණය භාවිත කරමින් සාර්ථක ගැබ් ගැන්වීමක් සිදු කර ඇත. මෙය රාජ්‍ය අංශයේ සාඵල්‍යතා මධ්‍යස්ථානයකින් (IVF Centre) සිදු කළ පළමු සාර්ථක ගැබ්ගැන්වීම ලෙස වාර්තා වෙයි.
කාලාන්තරයක් තිස්සේ සිදු කරන ලද අධ්‍යයනයක ප්‍රතිඵලයක් වශයෙන් මෙම ගැබ් ගැන්වීමේ කටයුත්ත සිදු කරන ලද්දේ කැලණිය විශ්වවිද්‍යාලයේ වෛද්‍ය පීඨයේ ප්‍රසව හා නාරිවේද අධ්‍යයනාංශයේ ජ්‍යෙෂ්ඨ කථිකාචාර්ය සහ උතුරු කොළඹ ශික්ෂණ රෝහලේ ප්‍රසව, නාරිවේද සහ මදසරුභාවය පිළිබඳ විශේෂඥ වෛද්‍ය සුරංග හෙට්ටිපතිරණ මහතා ප්‍රමුඛ වෛද්‍ය කණ්ඩායමක් විසිනි.
මේ පිළිබඳ මාධ්‍ය දැනුම්වත් කිරීමේ විශේෂ සාකච්ඡාවක් කැලණිය විශ්වවිද්‍යාලයේ උපකුලපති ජ්‍යෙෂ්ඨ මහාචාර්ය නිලන්ති ද සිල්වා මහත්මියගේ ප්‍රධානත්වයෙන් කැලණිය විශ්වවිද්‍යාලයීය සනාතන සභා රැස්වීම් ශාලාවේ දී පැවැත්විණි.
මෙහිදී අදහස් දැක්වූ විශේෂඥ වෛද්‍ය සුරංග හෙට්ටිපතිරණ මහතා,
IVF ප්‍රතිකර්මය ලංකාවට ආවේ 2002 දී. එදා සිට අද වෙනකම් IVF ප්‍රතිකර්මය සිදු කරන රෝහල් 10ක් 12ක් විතර ලංකාවේ තියෙනවා. හැබැයි ඒ ඔක්කොම තිබ්බේ පෞද්ගලික අංශයේ. මේ IVF ප්‍රතිකර්මය තමයි මදසරු යුවළකට ඇති අවසාන අවස්ථාව. නමුත් මේ IVF ප්‍රතිකර්මයට ලක්ෂ 10ක් 12ක් වැනි අධික වියදමක් යනවා. මේ සඳහා අවශ්‍ය වන ඖෂධ රජයේ මැදිහත් වීමෙන් අපට ලබා ගැනීමට හැකියාවක් තිබේ නම් මේ ප්‍රතිකර්මය සම්පූර්ණයෙන් නොමිලේ ලබා දීමේ හැකියාවක් අපට තියෙනවා. නැතිනම් පෞද්ගලික අංශයෙන් වැයවන මුදලට 50%කට වඩා අඩු මුදලකට මේ සේවාව ඉදිරියේ දී ලබා දෙන්න බලාපොරොත්තු වෙනවා.
මෙහිදී වෛද්‍ය පීඨයේ පීඨාධිපති මහාචාර්ය මාධව චන්ද්‍රතිලක, ප්‍රසව හා නාරිවේද අධ්‍යයනාංශයේ අංශ ප්‍රධානී නිර්වින්දන විශේෂඥ වෛද්‍ය ජ්‍යෙෂ්ඨ කථිකාචාර්ය අසන්ත ද සිල්වා, ප්‍රසව හා නාරිවේද අධ්‍යයනාංශයේ මහාචාර්ය සහ උතුරු කොළඹ ශික්ෂණ රෝහලේ ජ්‍යෙෂ්ඨ කථිකාචාර්ය, ප්‍රසව හා නාරිවේද පිළිබඳ විශේෂඥ වෛද්‍ය මහාචාර්ය ටිරාන් ඩයස්, ප්‍රසව හා නාරිවේද අධ්‍යයනාංශයේ ජ්‍යෙෂ්ඨ කථිකාචාර්ය සහ උතුරු කොළඹ ශික්ෂණ රෝහලේ ප්‍රසව, නාරිවේද සහ මදසරුභාවය පිළිබඳ විශේෂඥ වෛද්‍ය සුරංග හෙට්ටිපතිරණ සහ මෙම IVF මධ්‍යස්ථානය හරහා නළදරු තාක්ෂණයෙන් සාර්ථක ගැබ්ගැන්වීමට සම්බන්ධ වූ අඹු සැමි යුවළ ද අදහස් දැක්වූහ.
සන්නිවේදන හා මාධ්‍ය ඒකකයේ අධ්‍යක්ෂ ජ්‍යෙෂ්ඨ කථිකාචාර්ය සමන් රාජපක්ෂ මහතාගේ අධීක්ෂණය යටතේ කැලණිය විශ්වවිද්‍යාලයේ සන්නිවේදන හා මාධ්‍ය ඒකකය විසින් මෙම මාධ්‍ය සාකච්ඡාව සංවිධානය කරනු ලැබිණි.
