මෙරට සිසුන් ලක්ෂයක් පමණ වසරකට විදේශ අධ්‍යාපනය සඳහා යොමු වන අතර, එමගින් ඇමරිකානු ඩොලර් බිලියන 03ක් පමණ රටින් පිටතට යන බව නව ප්‍රජාතන්ත්‍රවාදී පෙරමුණේ මන්ත්‍රී රවී කරුණානායක මහතා පාර්ලිමේන්තුවේදී ඊයේ (03) පැවසීය.
ඒ හේතුවෙන් එම සිසුන් මෙරට විශ්වවිද්‍යාල තුළම රඳවා ගැනීම සම්බන්ධයෙන් ආණ්ඩුව ගන්නා ක්‍රියාමාර්ග පිළිබඳ දැනගැනීමට අවශ්‍ය බව වාචික පිළිතුරු අපේක්ෂාවෙන් ප්‍රශ්නයක් යොමු කරමින් හෙතෙම කියා සිටියේය.
රජයේ විශ්වවිද්‍යාලවලට ඇතුළත් කර ගැනීමේ ප්‍රමාණය වැඩි කරගැනීම ඇතුළු කරුණු සම්බන්ධයෙන් සාකච්ඡා කරමින් සිටින බව ඊට පිළිතුරු දෙමින් අධ්‍යාපන සහ උසස් අධ්‍යාපන නියෝජ්‍ය අමාත්‍ය වෛද්‍ය මධුර සෙනෙවිරත්න මහතා පැවසීය.
නව ප්‍රජාතන්ත්‍රවාදී පෙරමුණේ පාර්ලිමේන්තු මන්ත්‍රී රවී කරුණානායක මහතා – උසස් පෙළ විභාගය අවසානයේ 174,000ක් විශ්වවිද්‍යාලවලට සමත් වෙලා තියෙනවා. විශ්වවිද්‍යාල ප්‍රතිපාදන කොමිෂන් සභාව සිසුන් 55,400ක් අපේ විශ්වවිද්‍යාල 22ට ඇතුළත් වෙනවා කියලා වාර්තා කරනවා. ඒ අතරතුර මාධ්‍යයේ පළවෙනවා සාමාන්‍යයෙන් අවුරුද්දකට ලක්ෂයක් පමණ සිසුන් රටින් පිට යන බව. මේ නිසා ඇමරිකානු ඩොලර් බිලියන 3ක් රටින් පිට වෙනවා.
174,000ක් සමත් වෙලා තිබෙනවා නම්, රජයේ අනුග්‍රහයෙන් 55,000ක් විශ්වවිද්‍යාලවලට යනවා නම්, මේ අහිංසක දරුවන්ට අවස්ථාවක් නෑ ලංකාවේ විශ්වවිද්‍යාලවලට යන්න. මේ රටේ විදේශ විනිමය පිටට යන්නේ නැතිව පුළුවන් තරම් ලාංකිකයන්ට මෙහේ විශ්වවිද්‍යාලවල උපාධිය හදාරන්න සහ අවට රටවලිනුත් ලංකාවට අධ්‍යාපන සංචාරකයන් වශයෙන් මේ අවස්ථාව උපයෝගී කරගන්න අපිට බැරිද?
අධ්‍යාපන සහ උසස් අධ්‍යාපන නියෝජ්‍ය අමාත්‍ය වෛද්‍ය මධුර සෙනෙවිරත්න මහතා- කොහොමද අවස්ථාව වැඩි කරන්නේ කියා අපි සාකච්ඡාවක ඉන්නවා. උසස් අධ්‍යාපනය පමණක් නොවෙයි මෙවර අපි අධ්‍යාපන ප්‍රතිසංස්කරණ ඔස්සේත් උසස් අධ්‍යාපනය විශ්වවිද්‍යාලවලට පමණක් සීමා නොකර වෘත්තීය අධ්‍යාපනයට ලොකු ප්‍රමාණයක් යොමු කරන අදහස සහ ක්‍රියාවලිය ක්‍රියාත්මක කරමින් සිටිනවා. පාසල් අධ්‍යාපනයට වෘත්තීය අධ්‍යාපනය එකතු කිරීම එකක්. වෘත්තීය අධ්‍යාපනයට අවස්ථාව වැඩි කිරීම තව එකක්. මෙවර අධ්‍යාපන ප්‍රතිසංස්කරණවලට ව්‍යවසායකත්වය සහ විවිධාකාර කරුණු ඇතුළත් කර තියෙනවා.
ඒ වගේම රජයේ විශ්වවිද්‍යාල සහ අනෙකුත් විශ්වවිද්‍යාල ඒකාබද්ධ හුවමාරු වැඩසටහන් සම්බන්ධයෙන් අපි අවධානය යොමු කරනවා. අනිත් විශ්වවිද්‍යාල 28න් එහාට අපි මෙවර කරන කාර්යය තමයි ගුණාත්මක වර්ධනයක් කිරීම.
අකිත පෙරේරා, රනිල් ධර්මසේන
