“මිනිසා හදාගෙනම රට හදන්න. එසේ නොමැතිනම් රට හදනවා කියන එක බොරුවක් කියලා මඩිහේ පඤ්ඤාසීහ නාහිමිපාණන් වරෙක පවසනු ලැබුවා…’‘ යැයි අතිපූජ්‍ය ඕමල්පේ සෝභිත නාහිමිපාණන් පැවසූහ.
උන්වහන්සේගේ 75 වැනි ජන්ම දිනය නිමිත්තෙන් සංවිධානය කර තිබූ යතීන්ද්‍රාභිවන්දන මහෝත්සවයේදී උන්වහන්සේ එසේ පැවසූහ.
තවදුරටත් කතා කළ උන්වහන්සේ මෙසේද කියා සිටියේය.
“බලවේග දෙකක් තියෙනවා. සමාන වගකීම් තියෙන බලශක්තීන් දෙකක්. රජය සහ පූජ්‍ය පක්‍ෂය. තවදුරටත් මේක විග්‍රහ කළොත් සදාචාරය රකින්න පක්‍ෂ 3ක් තියෙනවා. ආණ්ඩු පක්‍ෂය, විපක්‍ෂය, පූජ්‍ය පක්‍ෂය. මේ පක්‍ෂ තුනටම මොනම ආකාරයෙන් හෝ විවාදයක් නෑ සදාචාරය රැකීම ප්‍රවර්ධනය කිරීම පිළිබඳව.
ඒ නිසාමයි මඩිහේ මහානායක හාමුදුරුවෝ සඳහන් කළේ මිනිසා හදාගෙනම රට හදන්න. එසේ නැතිනම් රට හදනවා කියන එක බොරුවක්. මිනිසා හදාගෙන රට හදන්න නම් සදාචාරය ප්‍රවර්ධනය විය යුතුයි. සදාචාරය ප්‍රවර්ධනය වෙන්න නම් අංක එක හොරකම පිටුදැකිය යුතුයි. මේ කාරණයට අපි කවුරුත් එකඟයි. අපිට දේශපාලන සංවාද තියෙන්න පුළුවන්. ආගමික සංවාද තියෙන්න පුළුවන්. නමුත් ඒ කිසිම සංවාදයක් මේකට අදාළ නැහැ. හොරකමට එරෙහිව අපි සියලු දෙනා ඒකාග්‍රයි. ඒකමතිකයි. අත්‍යවශ්‍යම යුතුකමක් ඉටුකිරීම සඳහා පැමිණ සිටින ජනාධිපතිතුමා ප්‍රමඛ රජය අනුගමනය කරන සොරකමට එරෙහි වැඩපිළිවෙළට අපට වාද නෑ. අපි සියල්ලෝම එකඟයි. අපි සියල්ලන්ගේම ප්‍රාර්ථනාව හොරකම පිටුදැකිය යුතුයි. හොරකම නැතිවෙනකොට රාජ්‍ය ආර්ථිකය වර්ධනය වෙනවා. සමාජ ආර්ථිකය වර්ධනය වෙනවා. රට සංවර්ධනය වෙනවා. රාජ්‍ය භාණ්ඩාගාරය පිරී ඉතිරී යනවා. සදාචාරය ප්‍රවර්ධනය වෙනකොට විදේශ කීර්තිය වර්ධනය වෙනවා. ඒක තමයි විදේශයෙන් ධන සම්පත් ගලාගෙන එන වැඩපිළිවෙළ. ඒ නිසා වත්මන් රජය ආරම්භ කර තිබෙන සදාචාර ප්‍රවර්ධන ව්‍යායාමය හොරකමට එරෙහිව යන වැඩපිළිවෙළට අපි සියලු දෙනාගේම සයෝගය ඒකමතිකත්වය ලබා දිය යුතුයි හොරකමින් තොර වංචාවෙන් තොර දූෂණයෙන් තොර සමාජයක් ගොඩනඟන්න.
ප්‍රදීප් ප්‍රසන්න සමරකෝන්
