ගෝලීය වශයෙන් බිලියන තුනකට අධික ජනගහණයකට ආහාර සැපයීමට හා ගෝලීය ඔක්සිජන් සැපයුමෙන් හරි අඩක් සැපයීමට දායක වන සාගර පතුළෙහි පවතින ජීවිත අපගේ දෑස ඉදිරිපිටම අඩුවෙමින් පවතින බව එංගලන්තයේ කිරුළ හිමි විලියම් කුමරු පවසා තිබේ. අපගේ දේශගුණය පවා හසුරුවන සාගර නිරෝගීව පැවතීම පෘථිවියේ වෙසෙන සියලු ජීවීන් හට අත්‍යවශ්‍ය බව පවසා ඇති විලියම් කුමරු වැඩිවෙන උෂ්ණත්වයන්, දූෂණය හා ප්‍රමාණය ඉක්මවා මසුන් ඇල්ලීම යන කරුණු ලොව පුරා පවතින සාගර ජලයට මෙන්ම එම ජලය ආශ්‍රිත රැකියාවල නිරතවන ප්‍රජාවන්ට දැඩි හානියක් සිදුකරන බව සඳහන් කර තිබේ.
මොනාකෝ රාජ්‍යයේ පැවති නිල් ආර්ථිකය සහ මූල්‍ය කටයුතු සංසදයේ රැස්වීම අමතමින් විලියම් කුමරු මෙම කරුණු අනාවරණය කර තිබේ. සාගරවලට සිදුවන හානිය වැළැක්වීම සඳහා ගෝලීය, ජාතික හා ප්‍රාදේශීය මට්ටමින් සාර්ථක ක්‍රියාමාර්ගයන් ගත යුතු බවද, ඉංග්‍රීසි හා ප්‍රංශ භාෂාවන්ගෙන් සිය දේශනය පවත්වමින් ඔහු වැඩිදුරටත් සඳහන් කර තිබේ.
