ඉන්ධන ගැසීමත් නවතියි
වායු දූෂණය හේතුවෙන් දැඩි ලෙස පීඩා විඳින ඉන්දියාවේ නවදිල්ලි නගරයේ ධාවනය කෙරෙන වායු දූෂණයට හේතු වන කාබන් ඇතුළු අහිතකර වායුන් වැඩි වශයෙන් පරිසරයට මුදාහරින පැරැණි වාහන සඳහා අද (01දා) සිට ඉන්ධන නිකුත් නොකිරීමටත් එවැනි වාහන දුටු ස්ථානයේදීම අත්අඩංගුවට ගෙන ඉවත දැමීම සඳහා රැගෙන යෑමටත් දිල්ලි නගර බලධාරීන් විසින් තීරණය කර තිබේ.
ඉකුත් සිකුරාදා (27දා) දිනයේ පැවැති නවදිල්ලි නගරයේ වායු තත්ත්ව කළමනාකරණ කොමිසම විසින් සංවිධානය කර තිබූ ඒකාබද්ධ සමුළුවකදී මෙම තීරණය පිළිබඳව අනාවරණය කර තිබේ. මේ අනුව වසර 10කට වඩා පැරැණි ඩීසල් වාහන හා වසර 15කට වඩා පැරැණි පෙට්‍රල් වාහන ආයු කාලය ඉකුත් වූ (ඊඕඑල්) වාහන සේ සැලකේ.
මෙම වාහන ධාවනය වන ස්ථාන මේ වන විට හඳුනාගෙන ඇති බවද බලධාරීහු එහිදී පවසා තිබේ. අදාළ සමුළුව අමතා කතා කර ඇති දිල්ලි රජයේ ප්‍රවාහන දෙපාර්තමේන්තුව හා දිල්ලි රථවාහන පොලිසියේ නිලධාරීන්ට අනුව මෙම වසරේ ජුනි මස 01 වැනිදා සිට 23 දක්වා වූ කාලයේදී දිල්ලි නගරයේ ධාවනය වන වාහන ලක්ෂ 1.4කට ආසන්න සංඛ්‍යාවක් මෙසේ පරිසරයට වැඩි වශයෙන් අහිතකර වායුන් මුදාහැරෙන ආයු කාලය ඉකුත් වූ වාහන ලෙස හඳුනාගෙන තිබේ.
මේ වනවිට නගරයෙන් සමස්තයක් ලෙස හඳුනාගෙන තිබෙන ආයු කාලය ඉකුත් වූ වාහන සංඛ්‍යාව ලක්ෂ 8.1කි. පර්යේෂකයන්ට අනුව මෙවැනි ආයු කාලය ඉවත් වූ පැරැණි වාහනයකින් නව වාහනයකට වඩා 5.5ක ගුණයක් වැඩිපුර වායු දූෂක වායුන් පරිසරයට මුදා හැරේ.
