මියන්මාරයේත් භූමිකම්පාවක්
දකුණු ඇමෙරිකානු රාජ්‍යයක් වන කොලොම්බියාවේ බොගාටා අගනුවරට සැතපුම් 72ක් ගිණිකොන දෙසින් පිහිටි ප්‍රදේශයක පෙරේදා (08දා) දිනයේ හටගත් රිච්ටර් මාපකයේ 6.3ක් වශයෙන් සටහන් වූ ප්‍රබල භූමිකම්පාවක් හේතුවෙන් බොගාටා අගනුවර ද සෙලවීමට ලක්ව ඇති බව විදෙස් මාධ්‍ය පවසයි. කොලොම්බියාවේ වේලාවෙන් පෙරේදා උදෑසන හටගෙන ඇති මෙම භූමිකම්පාව හේතුවෙන් කිසිවකුටත් හානි සිදුවූ බවට වාර්තා වී නැතත් ඉන් දැනුණු කම්පනය හේතුවෙන් බොගාටා අගනුවර වැසියන් ආරක්ෂාව පතා ඔවුන් සිටි ස්ථානවලින් ඉවත්ව ගොස් ඇති බව වාර්තා වේ.
පොළවේ සිට කිලෝ මීටර් 10ක් ගැඹුරින් හටගෙන තිබූ මෙම ප්‍රබල භූමිකම්පාවෙන් අනතුරුව රිච්ටර් මාපකයේ 4ක් හා 4.6ක් වශයෙන් සටහන් වූ පසු කම්පනයන් දෙකක්ද එම ප්‍රදේශයේ හටගෙන ඇති බව වාර්තා වී තිබේ. මේ අතර රිච්ටර් මාපකයේ 4.9ක් වශයෙන් සටහන් වූ ප්‍රබල නොවන භූමිකම්පාවක් ඊයේ (09දා) උදෑසන මියන්මාරයේ හටගෙන තිබේ. තායිලන්තයට ආසන්න ප්‍රදේශයක කිලෝ මීටර් 10ක් ගැඹුරින් හටගෙන ඇති මෙම භූමිකම්පාවෙන් අනතුරුව කුඩා පසු කම්පනයන් තුනක් හටගෙන ඇති අතර මෙම භූමිකම්පාවෙන් හා පසු කම්පනවලින් දේපළවලට හෝ පුද්ගලයන්ට හානි සිදු වූ බවක් වාර්තා වී නොමැත. තායිලන්තයට ආසන්නයෙන් මෙම භූමිකම්පාව සිදුව ඇතත් එහි කම්පනය එරටට දැනී නොමැති බවද වාර්තා වේ.
