විරෝධතා විසුරුවා හැරීමට කඳුළු ගෑස් හා රබර් උණ්ඩ ප්‍රහාර
ඇමෙරිකා එක්සත් ජනපදයේ කැලිෆෝනියා ප්‍රාන්තයේ සිටින නීති විරෝධී සංක්‍රමණිකයන් විසින් දියත් කර ඇති විරෝධතාවන් මැඬලීම සඳහා ජනාධිපති ඩොනල්ඩ් ට්‍රම්ප් විසින් එම නගරයට යවා ඇති ජාතික ආරක්ෂක හමුදා භටයන් ඊයේ (09දා) වන විට විරෝධතාකරුවන් 60 දෙනකු පමණ අත්අඩංගුවට ගෙන තිබිණි. නීති විරෝධී සංක්‍රමණිකයන් රටින් පිටුවහල් කිරීම සඳහා කැලිෆෝනියා ප්‍රාන්තය ඇතුළු ඇමෙරිකානු ප්‍රාන්ත පුරා දියත් කර ඇති වැටලීම්වලට එරෙහිව සැන්
ෆ්රැන්සිස්කෝ නගරයේ පැවති විරෝධතාවන්හි නියැලුනු පිරිසක් මෙසේ අත්අඩංගුවට පත්ව ඇති අතර, ජාතික ආරක්ෂක හමුදා භටයන් විසින් ලොස් ඇන්ජලිස් නගරයේ විරෝධතාවයේ යෙදුණු විරෝධතාකරුවන් විසුරුවාහැරීම සඳහා කඳුළු ගෑස් හා රබර් උණ්ඩ ප්‍රහාරයන්ද එල්ල කර තිබේ.
මේ අතර ඇමෙරිකානු ආගමන සේවා කාර්යාලය විසින් රට පුරා දියත් කර තිබෙන පිටුවහල් කිරීම සඳහා නීති විරෝධී සංක්‍රමණිකයන් සෙවීමේ මෙහෙයුම්වලට විරෝධය පාමින් සැන් ෆ්රැන්සිස්කෝ නගරයේ පිහිටි එම කාර්යාලය වෙත පෙරේදා (08දා) දිනයේ සිය ගණනක පමණ විරෝධතාකරුවන් පිරිසක් රැස්ව සිටි බව වාර්තා වේ. සැන්
ෆ්රැන්සිස්කෝ හා ලොස් ඇන්ජලිස් නගරවල පැවති නීති විරෝධී සංක්‍රමණිකයන්ගේ විරෝධතාවන් මුලින් සාමකාමී ලෙස පැවතියද පසුව පොලිසියේ මැදිහත්වීමත් සමගම එය ප්‍රචණ්ඩකාරී වී ඇති බව විදෙස් මාධ්‍ය පවසයි. එම විරෝධතා ප්‍රචණ්ඩකාරී වීමත් සමගම ඇමෙරිකානු ජනාධිපති ට්‍රම්ප් විසින් විරෝධතාකරුවන් මැඬලීම සඳහා ජාතික ආරක්ෂක භටයන් 300ක් පමණ දෙනා කැලිෆෝනියා ප්‍රාන්තය වෙත යවා තිබිණි.
