හේලීස් සමූහ ව්‍යාපාරයට අනුබද්ධිත හේලීස් ඇවෙන්චුරා (පුද්) සමාගම ශ්‍රී ලංකාව පුරා ජාත්‍යන්තර මට්ටමේ කාර්මික විසඳුම් ලබා දීම සඳහා කැපවීමෙන් කටයුතු කරන සමාගමකි. ඔවුන් සිය නවතම Avery Weigh – Tronix අලෙවි සහ සේවා මධ්‍යස්ථානය අංක 125, මඩකළපුව පාර, පොළොන්නරුව යන ස්ථානයේ දී පසුගිය දා විවෘත කරන ලදී. මෙම නව මධ්‍යස්ථානය, උතුරු මැද සහ නැගෙනහිර පළාත්වල ව්‍යාපාර සඳහා කිරුම් මිනුම් පිළිබඳ නවීනතම විසඳුම් පිරිනමමින් අත්‍යාවශ්‍ය සේවාවන් සැපයීමට පෙළගැසී සිටියි.
මෙම නව අලෙවි සහ සේවා මධ්‍යස්ථානය, හේලීස් සමූහයේ කාර්මික සහ ඉංජිනේරු අංශය වන හේලීස් ඇවෙන්චුරා (පුද්) සමාගම හට උතුරු මැද සහ නැඟෙනහිර කළාපය තුළ සිය පැවැත්ම ශක්තිමත් කරගැනීමට, මහත් රුකුලක් වන බව නොඅනුමානයි. නව මධ්‍යස්ථානය මගින් ඉහළ නිරවද්‍යතාවයකින් යුත් රසායනාගාර තරාදින්, ශක්තිමත් බිම් තරාදි සහ කෘෂිකර්මාන්තය, තොග සහ සිල්ලර වෙළෙදාම සඳහා අවශ්‍යවන අධිබලැති පාලම් තරාදි වැනි සියලුම පරිමාණයන්ට යටත් කිරුම් මිනුම් උපකරණ ලබාගත හැක.
Avery, AND සහ CAS වැනි ජාත්‍යන්තර කීර්තිමත් සන්නාමයන්ගෙන් සමන්විත, අතිනවීන තාක්ෂණය සහ විශ්වාසනීය ගුණාත්මකභාවය සහිත කිරුම් මිනුම් උපකරණ කළාපීය ව්‍යවසායකයන් වෙතට මෙම පොළොන්නරුව මධ්‍යස්ථානය සමීප කරයි. ඇල්පෙනෙත්තක බර සිට අලියෙකුගේ බර දක්වා කිරා බැලීමේ අසමසම නිරවද්‍යතාවයකින් සහ විශ්වාසනීය විසඳුම් සපයන හේලීස් ඇවෙන්චුරා, ඔබට අවශ්‍ය සියුම් අංශුවක කිරා බැලීමකදී හෝ වේවා මහා පරිමාණ තොග කිරා බැලීමකදී ඔබගේ නිසැක තේරීම වනු ඇත.
