වගාවට හානි කරන සතකු ලෙස හඳුනාගෙන ඇති දඬුලේනා පළිබෝධකයෙක් ලෙස සලකන ලෙස සත්ත්ව සංගණන වාර්තාව කියා තිබෙන බව කෘෂිකර්ම, පශු සම්පත්, ඉඩම් හා වාරි මාර්ග අමාත්‍ය කේ. ඩී. ලාල්කාන්ත මහතා පැවසීය.
සිය භුමියේදී දඬුලේනා පළිබෝධකයකු ලෙස සලකලා ඉවත් කරන ලෙස එමගින් නිර්දේශ කර ඇති බවත් තවත් කියන්න බැරි දේවලුත් එහි සඳහන් කර ඇති බවත් ඇමැතිවරයා අනුරාධපුර මඉලුප්පල්ලම ප්‍රදේශයේ පැවැති උත්සවයකින් අනතුරුව මාධ්‍යවේදීන් නැගූ ප්‍රශ්න කීපයකට පිළිතුරු ලබාදෙමින් පැවසීය.
එහිදී ඔහු මෙසේද කීවේය. අමාත්‍යාංශයට වාර්තාව භාර දීලා තියෙනවා. අපි මෙතනින් එහාට මේක කැබිනට් මණ්ඩලය එක්ක සාකච්ඡා කරලා, අලුත් නීතිරීතී හදන්න වෙයි, සමහර සත්තු පළිබෝධ කියලා ඇතුල් කරන්න වෙන තත්ත්වයක් ඇවිත් තියෙනවා. එකක් කියන්නම් දඬුලේනා පළිබෝධකයෙක් ලෙස සලකන්න කියලා වාර්තාව කියනවා, ඒ කියන්නේ ගොවියාට පුළුවන් තමන්ගේ භුමියේදී එයා පළිබෝධකයෙක් විදිහට සලකලා ඉවත් කරන්න. ඒ වගේ තව කියන්න බැරි දේවලුත් මේකේ තියෙනවා. මේක අපි මැදිහත් වෙනවාට වඩා අවශ්‍ය වෙන්නේ ඒ ක්ෂේත්‍රය සම්බන්ධ විශේෂඥයෝ සම්බන්ධවෙලා මෙවැනි කටයුතු කරන එක. අපිට තියෙන්නේ ඒ අයට සහය දෙන්න. අපේ සහාය අපි ලබාදෙනවා.
එප්පාවල – තිසර සමල්
