උ.පෙළ සිසුවෙක් මරුට: තුවාල ලැබූ 16ක් රෝහලේ
බලංගොඩ රජවක විදුහලේ උසස් පෙළ පන්ති කාමරයකට ඊයේ (12දා) පස්වරු 1.15 ට පමණ බෝගසක අත්තක් කඩාවැටීමෙන් සිදුවූ අනතුරකින් එක් සිසුවකු මරුමුවට පත්වී තවත් සිසුන් 16 දෙනකු තුවාල ලබා බලංගොඩ රෝහලට ඇතුළත් කර ඇතැයි බලංගොඩ පොලිසිය පවසයි. ශිෂ්‍යයෝ 11ක් සහ ශිෂ්‍යාවෝ 5ක් තුවාලකරුවෝ අතර වෙති.
මෙලෙස මියගොස් ඇත්තේ අ.පො.ස. උසස් පෙළ කලා අංශයේ ඉගෙනුම ලබමින් සිටි බලංගොඩ, රජවක, බිබිලවෙල පදිංචිව සිටි තිමිර හිරුජය නමැති 17 හැවිරිදි සිසුවෙකි.
බලංගොඩ ප්‍රදේශය හරහා ඊයේ පස්වරුවේ එක්වරම දැඩි සුළඟක් හමා ගොස් තිබේ. මියගිය සිසුවා ඇතුළු අනෙක් සිසුන් පන්ති කාමරය තුළ රැඳී සිටියදී පාසල් පරිශ්‍රය තුළ පිහිටි බෝගසක අත්තක් කඩා වැටී ඇතැයි හෙළිවූ බව පොලිසිය පවසයි.
තුවාල ලැබූ අනෙක් සිසු දරුවන්ගේ තත්ත්වය බරපතළ නොවන බව පැවසේ. සිසුවාගේ වියෝවෙන් විදුහලේ ආචාර්ය මණ්ඩලය, සිසු සිසුවියෝ හා දෙමාපියෝ දැඩි කම්පාවට පත්ව සිටිති.
මේ පිළිබඳව බලංගොඩ පොලිස් ස්ථානාධිපති ප්‍රධාන පොලිස් පරීක්ෂක කෝසල නවරත්න මහතාගේ උපදෙස් මත නිලධාරීහු කණ්ඩායමක් වැඩිදුර පරීක්ෂණ සිදුකරති.
ප්‍රදීප් ප්‍රසන්න සමරකෝන්, රක්වාන – ගයාන් සහ බලංගොඩ – එන්. එච්. පියසේන
